Petropavlda tún jarymynda kóshede esirtkige elitken 14 jasar bala júrgen
Petropavlda polıtseıler reıd júrgizip, kóshede mas júrgen on shaqty balany anyqtady. Olardyń biri esirtki paıdalanǵan, dep habarlaıdy QazAqparat tilshisi.
Soltústik Qazaqstan oblysy polıtsııa departamenti baspasóz qyzmetiniń málimetinshe, petropavldyq ıývenaldy polıtseıler joǵalǵan 15 jasar qyzdy izdep reıdke shyqqan.
Kóp uzamaı jasóspirim aman-esen tabyldy.
Qyzdyń aıtýynsha, ol telefonnyń daýsyn estimegen. Birge turatyn ájesi ýaıymdap, ne isterin bilmeı, ábden abdyraǵan.
Tártip saqshylary onymen profılaktıkalyq sıpattaǵy áńgime júrgizip, túngi kóshedegi reıdti jalǵastyrdy. Saýda úıleri, kóńil kóterý oryndary jáne jasóspirimder bolýy múmkin oryndar basty nazarda boldy.
«22-24 qyrkúıek aralyǵynda oblysta «Jasóspirim» jedel-profılaktıkalyq is-sharasy júrgizildi. Reıdke saqshylarmen birge bilim berý jáne jergilikti atqarýshy organdardyń ókilderi de qatysty. Úsh kún ishinde oblysta túngi ýaqytta kóshede jalǵyz júrgen 49 jasóspirim anyqtaldy. Olardyń ata-analary QR Ákimshilik quqyq buzýshylyq týraly kodeksiniń 442-baby boıynsha jaýapkershilikke tartyldy», - deıdi SQO PD jergilikti polıtsııa qyzmeti basqarmasynyń bastyǵy polıtsııa polkovnıgi Aıdyn Baımatov.
Budan bólek, ata-ana mindetterin oryndamaǵan 25 adam jazalandy. Mas kúıde usaq buzaqylyq jasaǵan 10 bala anyqtaldy.
24 qyrkúıekke qaraǵan túni tynyshtyqty buzý faktisine kelgen petropavldyq polıtseıler Qazaqstan Konstıtýtsııasy kóshesinde ashýǵa berilgen 14 jasar jasóspirimdi kóredi.
Medıtsına qyzmetkerleriniń aıtýynsha, ol esirtkilik masań kúıde bolǵan. Keıin jasóspirim oblystyq balalar aýrýhanasyna ornalastyryldy.
Polıtsııa qyzmetkerleri onyń tártibi men áreketin kámeletke tolmaǵandardyń isteri jónindegi komıssııada qaraý úshin materıaldar jınap jatyr.
«Sondaı-aq is-shara aıasynda 4 jasóspirim men qolaısyz 16 otbasy esepke qoıyldy. Olarmen tıisti kúndelikti jumystar júrgiziletin bolady. Іs-sharanyń maqsaty – kámeletke tolmaǵandar tarapynan bolatyn jáne olarǵa qatysty jasalýy múmkin qylmystar men quqyq buzýshylyqtardyń aldyn alý.. Eresekterden kámeletke tolmaǵan balalarynyń bos ýaqytyn baqylap otyrýdy, olardy tárıbeleýge belsendi qatysýylaryn suraımyz», - deıdi Aıdyn Baımatov.
