Petropavlda tún tynyshtyǵyn buzǵandarǵa bıyl 1600 hattama toltyryldy
Soltústik Qazaqstan oblysy Polıtsııa departamenti baspasóz qyzmetiniń málimetinshe, Petropavlda táýlikke jalǵa beriletin páterlerge qatysty turǵyndardan shaǵym kóp. Mundaı baspanalarda kóp jaǵdaıda jalǵa alýshylar spırttik ishimdikter iship, shýlaıdy eken.
Osyndaı páterlerdiń biri Ǵ.Músirepov kóshesinde ornalasqan. Ýchaskelik polıtsııa ınspektory shaǵymdarǵa baılanysty páter bıýrosynyń ákimgerimen birneshe ret sóılesken. Osyndaı kezekti bir shaqyrtýdan keıin bıýroǵa quqyqbuzýshylyqtarǵa ákeletin jaǵdaıdy túzetýge uıǵarym berildi. Osydan keıin bul baspana tek uzaq ýaqytqa ǵana jalǵa beriletin boldy, nátıjesinde turǵyndar tarapynan shaǵymdar da sap tyıyldy.
«Máseleni sheshýdiń bul qazir eń ońtaıly joly. Aıqaı-shý shyǵarǵan jalǵa alýshylar ákimshilik hattama toltyrǵannan keıin páterden shyǵarylady. Alaıda ekinshi túni bul jaǵdaı qaıtalanýy múmkin. Baspanany jalǵa alyp, araq-sharap ishetinder, qabyrǵanyń ár jaǵynda kórshilerdiń barlyǵyn, olardyń demalǵysy keletinin, shýdan kishkentaı balalardyń uıyqtaı almaıtynyn esten shyǵarady. Petropavlda kúndelikti osyndaı birneshe shaqyrtý túsedi», - deıdi Petropavl qalalyq polıtsııa basqarmasy bastyǵynyń mindetin atqarýshy Álibek Ǵabdýllın. Polıtseıler jumys kúnderi saǵat 22.00-den tańǵy saǵat 9.00-ge deıin, al demalys jáne mereke kúnderi saǵat 23.00-den 10.00-ge deıin shýlaýǵa tyıym salynǵanyn eskertedi. Ákimshilik quqyq buzýshylarǵa 5 AEK mólsherinde aıyppul bar.
Jalpy Petropavlda jyl basynan tún tynyshtyǵyn buzǵandarǵa 1600 hattama toltyrylǵan.