Petropavlda tún tynyshtyǵyn buzǵandar jazaǵa tartylyp jatyr
SQO Polıtsııa departamenti baspasóz qyzmetiniń habarlaýynsha, tártip saqshylary jyl basynan 574 adamǵa aıyppul salǵan. QR Ákimshilik quqyqbuzýshylyq týraly kodekstiń 473-baby boıynsha («Tynyshtyqty buzý») jeke tulǵalarǵa 5 AEK kóleminde aıyppul qarastyrylǵan.
Tártip saqshylarynyń aıtýynsha, páterdi táýlik boıyna jalǵa beretinder de kóp jaǵdaıda buzýshylyqtarǵa jol beredi. Olardyń qyzmetin kóńil kótergisi keletinder paıdalanyp, kórshi páter turǵyndarynyń mazasyn alyp jatqandaryna mán bermeıdi.
Petropavldaǵy Jambyl Jabaev kóshesindegi jalǵa beriletin páterge shaqyrtýmen kelgen polıtseıler birden 4 ákimshilik hattama toltyrdy. Spırttik ishimdik ishken top túnde shý shyǵaryp, bir úıdiń turǵyndarynyń demalysyna kedergi keltirgen.
«Sońǵy bes aıda turǵyndardan túsetin shaǵymdar sany artyp, 373-i tirkeldi. Páter ıeleri beımezgil ýaqytta basqalar mazasyn alǵan jaǵdaıda birden polıtseılerdi shaqyrady. Sol sebepti bizdiń qyzmetkerler jalǵa beriletin páter ıelerimen únemi túsindirý jumystaryn júrgizedi.
Jaqynda departament basshylyǵy Páter ıeleri kooperatıvteriniń tóraǵalarymen jáne jurtshylyqpen kezdesip, páter bıýrolary men qonaqúı jetekshilerine 23.00 men 06.00 aralyǵynda tynyshtyqty buzǵandar ákimshilik jaýapkershilikke tartylatyny týraly túsindirme-usynymdar jiberildi», - deıdi jergilikti polıtsııa qyzmeti basqarmasynyń basshysy Aıdyn Baımatov.
Al ústinen jıi shaǵym túsetin kásipkerlerdiń qyzmeti Petropavl qalasy ákimdigi janyndaǵy zańbuzýshylyqtardyń aldyn alý komıssııasynyń otyrysynda qaralmaq.
