Petropavlda tumaýdyń órshýine baılanysty bir mektep karantınge jabyldy
PETROPAVL. QazAqparat – Petropavlda ótkir respıratorlyq juqpaly aýrýlar men tumaýdyń beleń alýyna baılanysty bir mektep tolyǵymen jáne 5 bilim ordasynyń otyzdan astam synyby karantınge jabyldy, dep habarlaıdy QazAqparat tilshisi.
Petropavlda respıratorlyq juqpaly aýrýlar órship tur. SQO Densaýlyq saqtaý basqarmasynyń málimetinshe, oblystyq balalar aýrýhanasynyń juqpaly aýrýlar bólimine vırýsty ınfektsııa juqtyrǵan 40-tan astam bala kúndelikti qaralsa, 71-i qazir em qabyldap jatyr.
Sýyq tıgizgender men tumaýdy juqtyrǵandardyń artýyna baılanysty Qojabergen jyraý atyndaǵy №6 orta mektepti karantınge jabýǵa týra kelgen. Bilim ordasynda 600-den astam oqýshy oqıdy, sonyń 30% astamy densaýlyǵyna baılanysty sabaqty qaldyrǵan. Budan basqa qala mektepterindegi taǵy 31 synypta da oqý protsesi ýaqytsha toqtatyldy.
«Sanıtarlyq epıdemıologııalyq talaptyń erejelerin basshalaqqa ala otyra bilim ordasynda sabaqtar ýaqytsha toqtatyldy. Qazirgi ýaqytta №9,5,24,26 orta mektepter men «Best» gımnazııasynda keıbir synyptar karantınge jabyldy. Bul synyptarda sabaq 5-7 kúnge toqtatylady. Kún saıyn qaladaǵy barlyq mektep ákimshiligi bizge esep berip otyrady», - deıdi Petropavl qalalyq bilim bólimi ádisteme kabınetiniń meńgerýshisi Aınur Súıindikova.
Al oblystyq bilim basqarmasynyń málimetinshe, aýdandarda ázirshe balalardyń jappaı aýyrý deregi tirkelgen joq.
