Petropavlda túlekterge attestat tapsyrý rásiminde mekteptiń tóbesi qulady
PETROPAVL. KAZINFORM — Petropavldaǵy № 9 orta mekteptiń tóbesi qulady, zardap shekkender joq.
Mektep dırektory Gúlden Alenovanyń aıtýynsha, akt zalynyń tóbesi ishinara qulaǵan. Saltanatty is-shara sońyna taıap, oqıǵa kezinde barlyq túlek sońǵy ándi aıtýǵa sahnaǵa shyqqan eken.
— Búgin 57 túlek attestat aldy, olardyń ekeýi «altyn belgiden» úmitker, bireýine erekshe úlgidegi attestat tapsyryldy. Balalardyń barlyǵy sahnada boldy. Seksen shaqty ata-ana boldy. Al akt zalynyń tóbesi qulaǵan art jaǵynda eshkim bolǵan joq. Tóbeni qaptaǵan «armstrong» plıtasy qulady. Qazir tekserilip jatyr, sonyń nátıjesi boıynsha shara qoldanylady, — deıdi mektep basshysy.
Mektep basshysynyń aıtýynsha, ǵımarattyń salynǵanyna 40 jylǵa jýyqtaǵan.
1,5 myń oqýshy oqıtyn bilim ordasynda osy aptada aǵymdaǵy jóndeý jumysy bastalýy tıis bolatyn. Al akt zalynyń tóbesi bul plıtalarmen bes jyl buryn qaptalǵan eken.
Esterińizge salaıyq, buǵan deıin Petropavldaǵy Qojabergen jyraý atyndaǵy № 6 mektepte sabaq ýaqytynda synyptyń tóbesiniń sylaǵy qulap, saldarynan úsh oqýshy aýrýhanaǵa túsken edi.