Petropavlda TÚKSh bóliminiń basshysyna 3 mln teńge aıyppul salyndy
PETROPAVL. KAZINFORM — Petropavl qalasy ákimdiginiń qyzmetkeri memlekettik satyp alýda zań buzýshylyqtarǵa jol bergen.
Petropavl qalasynyń ákimshilik quqyq buzýshylyqtar jónindegi mamandandyrylǵan soty qalalyq turǵyn úı-kommýnaldyq sharýashylyq bóliminiń basshysy M.-ǵa qatysty ákimshilik isti qarady. Sottalýshyǵa Qazaqstan Respýblıkasy Ákimshilik quqyq buzýshylyq týraly kodekstiń 207-babynyń 18-bóligi (memlekettik satyp alý týraly zańnamany buzý) boıynsha aıyp taǵyldy.
Sottyń málimetinshe, 2024 jyly bólim basshysy memlekettik satyp alýlar týraly segiz shartty bir kózden tikeleı shart jasasý tásilimen bekitken. Alaıda bul tásil zańnamaǵa sáıkes tek erekshe jaǵdaılarda, mysaly, tótenshe jaǵdaıdyń saldaryn joıý kezinde ǵana qoldanylýy tıis. Al bul sharttardyń oǵan qatysy joq, olar: jaryqdıodty jabdyqtardy daıyndaý jáne ornatý, erigen jáne jaýyn-shashyn sýlarynyń sorylýy, Petropavldaǵy Birlik shaǵyn aýdanyndaǵy turǵyn úılerge arnalǵan aǵash qurylymdardy ornatý.
Atap aıtqanda, «OLIVIN Lighting» JShS jáne «Qyzyljar-sý» JShS-men jasalǵan sharttar keıin buzylyp, bul jumystar múlde oryndalmaǵan. Nátıjesinde bólingen qarajat bıýdjetke qaıtarylǵan. Sot bul epızodtardy shamaly mańyzdy quqyq buzýshylyq retinde tanyp, jaýapty tulǵaǵa aýyzsha eskertý berýmen shekteldi.
Qalǵan alty jeke kásipkermen jasalǵan sharttar da qoldanystaǵy zańnama talaptaryna qaıshy júrgizilgen, bul aýdıtorlyq tekserý nátıjesinde rastaldy.
Sot M.-ny ákimshilik quqyq buzýshylyq jasaǵany úshin kináli dep tanyp, oǵan 3 101 280 teńge kóleminde aıyppul saldy. Sot qaýlysy zańdy kúshine endi.
Buǵan deıin SQO-da ákimshilik quqyq buzý boıynsha kórsetilim sot protsesteri ótkizilip jatqanyn jazǵan edik.