Petropavlda tsıfrlyq monıtorıng aıasynda 400 kamera ornatý josparlanǵan
PETROPAVL. KAZINFORM — Petropavlda bıyl ınfraqurylymdy jańǵyrtý, abattandyrý jáne jaıly qalalyq ortany qalyptastyrý baǵytynda birqatar iri joba júzege asyrylmaq.
Bul týraly Soltústik Qazaqstan oblysynyń ákimi Ǵaýez Nurmuhambetov qala turǵyndarymen eseptik kezdesýde aıtty. Máselen bıyl Petropavlda 31 kóshege ortasha jóndeý júrgizý, sondaı-aq Frýnze kóshesin qaıta jańǵyrtý josparlanǵan. Nátıjesinde «Bereke» shaǵyn aýdanyndaǵy kólik júktemesi azaıyp, bul ony qalanyń ortalyq bóligimen baılanystyrady. Al Kızatov kóshesin rekonstrýktsııalaý Birlik-1 jáne Birlik-2 jańa shaǵynaýdandaryn damytýǵa serpin beredi.
— Jalpy bıyl abattandyrý jumystary 20 kvartaldy qamtıdy. Mańyzdy ınfraqurylymdyq jobalar da iske asyrylyp jatyr. Atap aıtqanda, TM-2 jáne TM-15 jylý magıstraldarynyń qurylysy bastaldy. Bul turǵyn úıler men áleýmettik nysandardy jylýmen qamtýdy jaqsartady. Qalada turmystyq qatty qaldyqtardy shyǵarý boıynsha tsıfrlyq monıtorıng engizildi. Qazirgi tańda 47 beınebaqylaý kamerasy ornatylǵan, bıyl qosymsha taǵy 400 kamera ornatý josparlanǵan, — dedi oblys ákimi.
Sondaı-aq 215 myń sharshy metr turǵyn úıdi paıdalanýǵa mindeti tur. Budan bólek 280 oryndyq balabaqsha qurylysy bastaldy, Pestroe kóli mańynda trıatlon aımaǵy bar ekopark jobasy júzege aspaq.
Tyń jobalardyń biri — M.Qozybaev atyndaǵy Soltústik Qazaqstan ýnıversıteti negizinde K.Baıseıitova atyndaǵy Qazaq ulttyq mádenıet jáne óner ınstıtýtynyń ókildigin ashý josparlanǵan. Nátıjesinde bes mamandyq boıynsha bıyl 100 stýdentti qabyldaý kózdelgen.
Sport salasyn damytyp, qoljetimdi ınfraqurylym qalyptastyrý maqsatynda ınklıýzıvti sport nysanyn salý, muz arenasy men ámbebap sport keshenin iske qosý, sondaı-aq fýtbol akademııasy bar jabyq stadıon qurylysy josparlanǵan.
Buǵan deıin Sý resýrstary jáne ırrıgatsııa mınıstrligi qurylysy aıaqtalmaǵan 10 jobany qaıta qolǵa alyp, qoldanysqa berýdi josparlap otyrǵanyn jazǵan edik.
