Petropavlda tropıkalyq jemis aǵashtary mol ónim berip jatyr
PETROPAVL. QazAqparat – Petropavldyń botanıkalyq baǵyndaǵy tropıkalyq aǵashtar bıyl mol ónim berip jatyr. Kýbalyq lımonnyń bireýiniń salmaǵy 1 kelige jetedi, dep habarlaıdy QazAqparat tilshisi.
Petropavldaǵy botanıkalyq baqqa lımonnyń eki túp aǵashyn bas agronom Ravıl Rıazapov sonaý Kýbadan ákelgen eken. Ol ozat oqýshy retinde 1960 jyly Máskeýdegi Halyq sharýashylyǵy jetistikteri kórmesine qatysyp, delegatsııa quramynda Kýbaǵa joly túsedi.
Jylyny súıetin ósimdikti sol kezde Kýbanyń aýyl sharýashylyǵy mınıstriniń qyzmetin atqarǵan Raýl Kastro syılaǵan eken. Sodan beri kýbalyq lımon alǵash ret mol jemis berip otyr.
«Bireýiniń salmaǵy orta eseppen 800-900 gramm. Arasynda 1 keli 200 gramm bolatyndary da bar. Úlken bolǵanymen, biz kórip júrgen lımondarǵa uqsaıdy. Dámi de sondaı qyshqyl», - deıdi Ravıl Rıazapov.
Oranjereıanyń bas agronomy bıyl banannyń da jemis bergenin aıtady. «Patshanyń banany» dep atalatyn bul sort Vetnamnan ákelingen. Jeti jyldyń ishinde tropıkalyq aǵashtyń bıiktigi 3 metrge deıin jetipti.
«Jańa jyl qarsańynda banannyń jemis berýi bizge tosyn syı boldy. Aǵashtyń gúldeýin kópten kútken edik. Bul biz saýda oryndarynan kóretin banannan erekshe. Kishkentaı jáne óte dámdi keledi», - deıdi agronom.
Búgingi kúni botanıkalyq baqta 2 myńǵa jýyq sırek kezdesetin ósimdik bar.
