Petropavlda trıatlon jáne dýatlon boıynsha el chempıonaty ótti

Soltústik Qazaqstan oblysy dene shynyqtyrý jáne sport basqarmasynyń málimetinshe, jarysty uıymdastyrýshy - «Qazaqstan trıatlon federatsııasy» qoǵamdyq birlestigi. Jarys osy jylǵa arnalǵan respýblıkalyq buqaralyq-sporttyq is-sharalardyń biryńǵaı kúntizbesine engizilgen jáne ulttyq deńgeıdegi resmı sporttyq jarys bolyp esepteledi.

Jarystar Pestroe kólinde, jańadan salynǵan EKO-park aýmaǵynda ótti. Mundaı jarystar buqaralyq sportty damytýǵa, salamatty ómir saltyn nasıhattaýǵa jáne zamanaýı sporttyq ınfraqurylymdy tıimdi paıdalanýǵa múmkindik beredi.

Oblys ákiminiń orynbasary Júsip Jumaǵulovtyń aıtýynsha, trıatlon óńir úshin salystyrmaly túrde jańadan damyp kele jatqan sport túri, sońǵy jyldary oǵan qyzyǵýshylyq aıtarlyqtaı artqan.

- Trıatlon - júzý, velosport jáne júgirýdi biriktiretin keshendi saıys. Ol sportshylardan joǵary daıyndyqty, myqty minezdi, tártipti talap etedi. Búginde balalar men jastardyń trıatlonǵa qyzyǵýshylyǵy ósip, óńirlik federatsııanyń jumysy jandanyp, jarystarǵa qatysýshylar sany kóbeıip keledi.

Jalpy qazir oblysta 227,5 myńǵa jýyq adam adam dene shynyqtyrý jáne sportpen turaqty túrde aınalysady. Bul óńir halqynyń 44%, - deıdi Júsip Jumaǵulov.

Baǵdarlama aıasynda eki dıstsıplına boıynsha júldeler sarapqa salyndy. Elite, U19 jáne U15 sanattary boıynsha aralas estafetadaǵy trıatlon jarystary, sondaı-aq U15 jáne U13 sanattaryndaǵy sportshylar arasynda dýatlon saıystary ótti.

Trıatlonnan sportshylar 250 metrge júzdi, 6,6 shaqyrymdy velosıpedpen ótti jáne 1,6 shaqyrymǵa júgirip jarysty.

Al dýatlonnan: júgirý - 1 shaqyrym, velokezeń - 8 shaqyrym, júgirý - 2 shaqyrym boldy.

Nátıjesinde Elite sanatynda 1 saǵat 34 mınýt ortaq ýaqytymen Astana komandasy jeńiske jetti. U19 sanatynda da astanalyq komanda 1 saǵat 38 mınýtpen topty jardy. U15 sanatynda 1 saǵat 40 mınýt ýaqytymen Aqmola oblysynyń komandasy birinshi oryndy aldy.

Buǵan deıin Fılıppınniń Kandon qalasynda voleıboldan áıelder komandalary arasynda ótip jatqan Azııa kýbogy oıyndarynda Qazaqstan quramasy úshinshi kezdesýinde jeńiske jetkenin jazǵan edik.