Petropavlda tótenshe jaǵdaı jarııalanǵannan keıin zardap shekkenderge ótemaqy berilmek
Petropavl qalalyq ákimdigi 7 mamyr kúni «Bereke» shaǵyn aýdanynda bolǵan órtke qatysty qazir qandaı jumys istelip jatqanyn aıtty.
Búginde tergeý júrýde, ázirge órttiń shyǵý sebebi anyqtalǵan joq.
Qala ákiminiń baspasóz hatshysy Elmıra Sádýaqasovanyń aıtýynsha, 7 mamyr kúni tótenshe jaǵdaı boıynsha komıssııa qurylyp, olar tıisti jumysty atqaryp jatyr.
«8 mamyr kúni olar órt bolǵan jerdi tekserip shyqty, nátıjesinde 9 úıdiń tolyq janyp ketkenin jáne taǵy eki baspananyń ishinara zaqymdanǵanyn anyqtady. Sol kúni komıssııa zardap shekkenderge ýaqytsha turatyn úı berý máselesin qarady, qazirgi ýaqytta 7 otbasy jalǵa beriletin páterlerge demeýshilerdiń aqshasyna ornalastyryldy. Olar kúndelikti turmysqa qajet barlyq kerek-jaraqpen: azyq-túlikpen, dári-dármekpen, jeke gıgıenalyq quraldarmen qamtyldy.
Qazir taǵy 4 otbasy biz usynǵan sheshimmen kelispeı jatyr, sol sebepti basqa nusqalaryn qarap jatyrmyz. Páterlerdi olardyń balalary baratyn mektepterdiń janynan izdeımiz. Otbasynyń quramy da esepke alynady. Olar ázirge týǵan-týystarynda turyp jatyr», - deıdi Elmıra Sádýaqasova.
Mamannyń aıtýynsha, jalǵa beriletin páterler oblys ortalyǵyndaǵy ortasha baǵa boıynsha alyndy. Al 4 otbasy qonystanǵysy kelgen páterler naryqtaǵy baǵadan joǵary.
«8 mamyr kúni «Ashyq» normatıvtik-quqyqtyq aktilerdiń portalynda tehnogendik sıpattaǵy tótenshe jaǵdaı rejımin engizý jóninde qaýlynyń jobasy jarııalandy. Qazirgi ýaqytta onlaın túrde talqylaý júrip jatyr.
Tótenshe jaǵdaı rejımi bizge zardap shekkenderge zań aıasynda kómek kórsetý úshin qajet. Máselen, osydan keıin úı ıelerine 100 AEK mólsherinde járdemaqy beriledi.
Tótenshe jaǵdaı rejımi jarııalanǵannan keıin táýelsiz sarapshylar kelgen materıaldyq shyǵyn mólsherin esepteıdi. Osydan keıin zardap shekkenderge ótemaqy beriledi. Ol aqshaǵa baspana alýlaryna bolady. Búgin qujattary janyp ketken otbasylar jańadan jeke kýálikterin istetip jatyr», - deıdi qala ákiminiń baspasóz hatshysy.
15 jylǵa shaqtalǵan Petropavldyń bas jobasy boıynsha búginde kúlge aınalǵan úıler súrilýi tıis bolatyn.
