Petropavlda tórt kún boıy ortalyq alańda merekelik is-sharalar ótedi
PETROPAVL. QazAqparat – Petropavlda bıyl Naýryz meıramy bar sán-saltanatymen tórt kún boıy toılanbaq. Qala turǵyndary men qonaqtaryna qyzyqty baǵdarlama usynylady, dep habarlaıdy QazAqparat tilshisi.
Petropavl qalalyq ákimdiginiń málimetinshe, negizgi merekelik is-shara Petropavldaǵy ortalyq alańda ótedi. 20 naýryz kúni saǵat 15.00-de «Áz-Naýryzym, armysyń!» atty kontserttik baǵdarlama, «Qyzyljar sheberler mekeni» atty qolónershilerdiń respýblıkalyq festıvali jáne bıylǵy mereıtoı ıeleri – Muhtar Áýezov, Ahmet Baıtursynov, Ǵabıt Músirepov, Safýan Sháımerdenov, Kákimbek Salyqov sııaqty tulǵalardyń qurmetine arnalǵan kórme jáne saýda jármeńkesi ashylady.
Bul kúni sporttyq oıyndar da oınatylady. Qala turǵyndary men qonaqtaryna belgili qara kúsh ıesi Sergeı Tsyrýlnıkov jáne Street Workout boıynsha QR bas bapkeri Aıtym Jaqypov óner kórsetedi, jastarmen kezdesedi.
21 naýryz kúni mereke saǵat 11.00-de bastalmaq. Bul kúni saýda jármeńkesi, kontserttik baǵdarlama men sheberler festıvali jalǵasady. Jurttyń nazaryna Tashkent qalasynyń darshylary arqanda óner kórsetedi. Keshki saǵat 18.00-de qazaq estradasynyń ártisteri qatysqan kontsert ótedi.
22-23 naýryzda da merekelik is-sharalar saǵat 11.00-de bastalmaq. Bul kúnderi de saýda-sattyq qyzyp, jurt nazaryna qolónershiler óz buıymdaryn usynady, «Áz-Naýryzym, armysyń!» atty kontserttik baǵdarlama qoıylady.
