Petropavlda tok soqqan jumysshy sotta jeńip, ótemaqy alatyn boldy

PETROPAVL. KAZINFORM – Petropavlda jumys barysynda tok soǵyp, keıin aıaq-qolynan aıyrylǵan er adam jumys berýshini sotqa berip, jeńdi.

Soltústik Qazaqstan oblystyq soty baspasóz qyzmetiniń málimetinshe, Petropavldaǵy seriktestikterdiń biriniń jumysshysyn elektr taratý jelileriniń janynda jumys istep júrgende tok soqqan. Saldarynan aýyr dene jaraqattaryn aldy: bas terisi, oń qoly men aıaǵy kúıip, keıin ampýtatsııa jasaldy. Densaýlyǵyna baılanysty úshinshi top múgedektigi belgilendi.

SQO boıynsha memlekettik bas eńbek ınspektory jumysshy men jumys berýshiniń kinási teń dárejede degen qorytyndyǵa kelgen. Er adam bul sheshimmen kelispeı sotqa júginip, tergeý naqty mán-jaıdyń anyqtalmaǵanyn jáne jasalǵan tujyrymdar negizsiz ekenin kórsetti.

Jaýapkerdiń ókili jumysshy jeke qaýipsizdik sharalaryn saqtamady dep málimdedi.

Sot iske qatysty materıaldardy zertteý barysynda jumys berýshi tarapynan eleýli zańbuzýshylyqtardy anyqtady, ıaǵnı eńbek qaýipsizdigi boıynsha nusqaýlyqtar bolmaǵan, jumys elektr jelileri ıesimen kelisilmegen, sondaı-aq asa qaýipti jumystardy oryndaýǵa narıad-ruqsat resimdelmegen. Sonymen qatar, jumysshynyń jeke qaýipsizdik sharalaryn saqtamaǵandyǵy dáleldengen joq.

Sot zardap shegýshiniń talabyn qanaǵattandyrdy. Eki tarap ta kináli degen qorytyndy zańsyz dep tanylyp, jumys berýshiniń kinási tolyq dáleldendi. Oblystyq soty birinshi ınstantsııa sheshimin ózgerissiz qaldyrdy.

Nátıjesinde óndiris ornynda zardap shegýshiniń kinási joqtyǵy tolyq moıyndalyp, oǵan óndiristik jaraqat kezinde beriletin ótemaqylar men tólemderdi tolyq kólemde alý múmkindigi týdy. 

Sheshim zańdy kúshine endi.

Buǵan deıin óndiristegi jazataıym oqıǵalardy tergeý protsesi tolyq avtomattandyrylatyndyǵyn jazǵan edik.