Petropavlda tıisti talaptardy oryndamaǵan kompanııalarmen kelisimshart buzyldy
PETROPAVL. QazAqparat – Petropavl qalalyq ákimdigi tıisti talaptardy oryndamaǵany úshin jolaýshy tasymaldaıtyn «Avrora-Transservıs» jáne «PARTNER-AVTO» JShS-men eki baǵyt boıynsha kelisimshartty buzdy, dep habarlaıdy QazAqparat tilshisi.
Petropavl qalalyq ákimdigi eki jolaýshy tasymaldaýshy kompanııamen kelisimshartty buzdy. Onyń biri - «Avrora-Transservıs» JShS, bul kompanııa 14-inshi baǵytta jumys istedi. Ekinshisi - «Partner-Avto» JShS, 8-inshi baǵytta jolaýshy tasymaldady. 14-baǵyt Prıbrejnyı eldi mekeninen 20 yqshamaýdanǵa deıin barady. Al 8-baǵyt Borkı-Jumysshy kentine qyzmet kórsetedi.
«Bul eki kásiporyn da úlken qarjylaı qıyndyqty bastan ótkerip jatyr.
Sondaı-aq maman jetispeýshiligi máselesi bar. Qosymsha rezervtik kólikteri joq. Munyń barlyǵy – kompanııanyń jumysyna kedergi keltirip, shyǵynǵa ushyratty. Zań boıynsha jolaýshylar tasymalymen aınalysatyn kásiporynnyń eki aı ýaqyt baǵyttaǵy kólikteri 70 %-dan az bolsa, jergilikti atqarýshy organ onymen kelisimshartty buzýǵa quqyly. Qazir ákimdik jańa konkýrs ótkenge deıin basqa kompanııalarmen ýaqytsha kelisimge otyrdy», -
deıdi «SQO Avtokólik odaǵy» qaýymdastyǵynyń tóraǵasy Galına Semenova.
Jaqynda oblys ortalyǵyna jańa avtobýstar kelmek. Bul qoǵamdyq kólik jumysyn qaıta qurýǵa sep bolmaq.
«Jańa avtobýstar kóptegen máseleni sheshýge múmkindik beredi dep oılaımyz.
Keı baǵyttar qaıta qaralýy múmkin. Qyzmet kórsetý sapasy jaqsarady. Petropavlda qoǵamdyq kólikke degen suranys tolyq qanaǵattandyrylady. Qazirgi ýaqytta keı baǵyttar bir-birin qaıtalaıdy, bul – tıimsiz.
Tasymaldaýshylar shyǵynǵa batady. Osyǵan baılanysty baǵyttar ońtaılandyrylady. Eki jaqty tıimdi keste qurylady.
Petropavl turǵyndaryn da eskertkimiz keledi. Petropavlǵa syıymdylyǵy joǵary úlken avtobýstar kelgen jaǵdaıda, qoǵamdyq kólikterdiń ıntervaly 2-3 mınýtqa ulǵaıtylyp, orta eseppen qazirgi 6 mınýttan 10 mınýtqa jetkiziledi. Jolaqy óspeıdi, turǵyndardyń qaltasyna salmaq salmaý úshin tasymaldaýshylarǵa sýbsıdııa beriledi», - deıdi Galına Semenova.
«Avrora-Transservıs» kompanııasynyń budan basqa 2 baǵytta avtobýstary júr. «Partner-Avtonyń» shamamen 5-6 baǵyty bar. Olarmen tek bir baǵyt boıynsha ǵana kelisimshart buzyldy.
2014 jyly Petropavlda 350 avtobýs kúndelikti baǵytqa shyqsa, qazir oblys ortalyǵynda 200-deı avtobýs jolaýshy tasymaldaıdy. 10 kompanııa qyzmet kórsetedi.
