Petropavlda terektiń mamyǵy janyp, 1,5 gektar aýmaqty órt shaldy
PETROPAVL. QazAqparat – Petropavldaǵy saıajaılardyń biriniń qasynda terektiń mamyǵy órtenip, 1,5 ga jer janyp ketti, dep habarlaıdy QazAqparat tilshisi.
Soltústik Qazaqstan oblysy polıtsııa departamenti baspasóz qyzmetiniń málimetinshe, 8 maýsym kúni saǵat 18.05 shamasynda 101 nómirine Petropavldaǵy Zarechnyı kentinde órt shyqqandyǵy týraly habarlama túsedi. Esil ózeniniń boıynda, «Iskra» saıajaıynyń qasynda terektiń mamyǵy tutanyp, órt kepken shópke jaıylǵan.
Oqıǵa ornyna №2 jáne №3 órt sóndirý bólimsheleriniń jeke quramynan 10 adam jáne 2 tehnıka jumyldyryldy. 1,5 ga jaıylǵan órt tek bir saǵattan keıin ǵana tolyq sóndirildi.
Mamandardyń aıtýynsha, zardap shekkender joq. Kelgen shyǵyn mólsheri anyqtalatyn bolady.
Buǵan deıin SQO-da terek mamyǵynan órtterdiń jıilep ketkenin aıtqan edik.
