Petropavlda terek mamyǵy órt shyǵýyna sebep bolyp jatyr
PETROPAVL. QazAqparat – Petropavlda terektiń mamyǵy órt jıileýine sebep bolyp jatyr. Órt sóndirýshiler osy kúnge deıin 50 shaqyrtýǵa bardy, dep habarlaıdy QazAqparat tilshisi.
Soltústik Qazaqstan oblysy tótenshe jaǵdaılar departamenti baspasóz qyzmetiniń málimetinshe, Petropavldaǵy 314-shi atqyshtar dıvızııasy kóshesi, 170 mekenjaıy boıynsha ornalasqan jeke aýlada saǵat 14.05 shamasynda órt shyqty. Bireýler terek mamyǵyn órtep, saldarynan qora-qopsy tolyq janyp ketti. Turǵyn úıdiń shatyry men qabyrǵasy zaqymdandy.
Sol kúni keshke oblys ortalyǵyndaǵy Ahremenko, 5 mekenjaıynda ornalasqan garaj ben temir konteınerde órt shyqty. Olardyń shatyry tıpografııa ǵımaratymen bir bolǵan. Saldarynan garajǵa zaqym kelip, baspahananyń dúnıesi janyp ketti. Bul joly da órt terek mamyǵynan shyqqan.
«Órtke qaýipti maýsym bastalǵaly óńirde kepken shóp, qamystyń janýyna qatysty 450 órt tirkeldi. 16 orman órti sóndirildi.
Terek mamyǵy órttiń kóbeıýine sebep bolyp otyr. Sońǵy kúnderi osyndaı 50 shaqyrtýǵa bardyq. Ekeýinde turǵyn úı men qora-qopsy zaqymdandy», - deıdi SQO TJD basqarmasynyń bastyǵy Dmıtrıı Rastıhın.
Jalpy, jyl basynan oblysta 327 órt tirkelip, 34 adam mert boldy. Bul ótken jyldyń osy kezeńimen salystyrǵanda 27 %-ǵa kóp. Kelgen shyǵyn 143 mln teńgeden asady.
