Petropavlda teplovoz kólikpen soqtyǵysyp qaldy
PETROPAVL. QazAqparat – Teplovoz júrgizýshisi temirjoldy basyp ótpek bolǵan kóliktiń saldarynan shuǵyl toqtaýǵa májbúr bolǵan, dep habarlaıdy QazAqpart Petropavlovsk.news aqparattyq agenttigine silteme jasap.
Qalalyq polıtsııa basqarmasy Benzostroı aýdanyndaǵy temirjol ótkelinde bolǵan oqıǵanyń egjeı-tegjeıin aıtyp berdi. Belgili bolǵandaı, «VAZ 2110» markaly avtomobıldiń 41 jastaǵy júrgizýshisi «STOP» jol belgisiniń talaptaryn elemeı, № 1216 teplovozynyń ótýin bógep, temirjolǵa shyǵyp ketken. Osydan keıin teplovoz júrgizýshisi tez arada tejegishti basýǵa májbúr bolǵan.
«Jol-kólik oqıǵasy saldarynan jedel járdem mamandary jeńil kólik júrgizýshisin Petropavl medıtsınalyq mekemesine jetkizdi. Alǵashqy shuǵyl kómek kórsetilgennen keıin medıtsına qyzmetkerleri er adamdy úıine jiberdi», – dedi polıtsııa.
Sarapshylar Ońtústik Oral temirjolyna keltirilgen materıaldyq zalaldy anyqtaǵannan keıin júrgizýshige qatysty QR ÁQBtK-niń 610-babynyń 1-bóligi «Kólik quraldary júrgizýshileriniń jol júrisi qaǵıdalaryn adamdardyń densaýlyǵyna zııan keltirýge, kólik quraldarynyń nemese ózge de múliktiń búlinýine alyp kelgen zań buzýshylyǵy» boıynsha ákimshilik hattama toltyrady.
Protsessýaldyq sheshim qabyldaý úshin barlyq materıaldar Petropavl qalasynyń polıtsııa basqarmasynyń ákimshilik polıtsııa bólimine tapsyrylady.
