Petropavlda tennıs ortalyǵy memleket menshigine qaıtaryldy

PETROPAVL. KAZINFORM – Petropavldaǵy sport nysanynyń paıdalanýǵa berilgenine on jyl da ótpegen.

Soltústik Qazaqstan oblystyq ákimdiginiń málimetinshe, ámbebap tennıs ortalyǵy memlekettik-jekeshelik áriptestik aıasynda 2018 jyly salynyp, buǵan deıin jekemenshikte bolǵan. Birneshe jyldan keıin qurylysta jiberilgen kemshilikteri anyqtala bastady: alańnyń jabyndysy jarylyp, drenaj júıesi isten shyqty.

- Zańǵa sáıkes nysandy birden memleket menshigine alý múmkin bolmady, qaıtarý úshin birneshe jyl sottasýǵa týra keldi. Tek bıyl jazda ortalyq memleket menshigine qaıtarylyp, jergilikti bıýdjet esebinen keshendi jóndeý jumystary bastaldy. Nysan tolyqtaı zamanaýı standarttar men qaýipsizdik talaptaryna sáıkes keledi: tennıs alańy, drenaj júıesi jańartyldy, jaryqtandyrý júıesi ornatyldy. Qazirgi ýaqytta tórt jabyq jáne úsh ashyq kort jumys isteıdi, sondaı-aq myń oryndyq kórermen trıbýnasy bar, - deıdi oblys ákimi Ǵaýez Nurmuhambetov.

Qazir ortalyqta respýblıkalyq týrnır ótip jatyr, oǵan elimizdiń túkpir-túkpirinen 60-tan astam tennısshi qatysqan. Al qańtar aıynda tennısten alǵashqy halyqaralyq jarys ótpek. 15 elden kelgen sportshylar qatysady dep josparlanǵan.

Mamandardyń aıtýynsha, balalar sportyn damytý maqsatynda 10 bilim berý uıymynda tennıs sektsııalary ashylady. Qazaqstan tennıs federatsııasy shet qalmaı, qoldaý kórsetip, barlyq alańdy qajetti jabdyqtarmen qamtamasyz etpek. Alǵashqysy «Bereke» shaǵyn aýdanyndaǵy №29 orta mektepte ashyldy.

Buǵan deıin Petropavlda sý basý qaýpi joǵary Zarechnyı kenti turǵyndaryna jańa páterler berilgenin jazǵan edik.