Petropavlda tehnogendik sıpattaǵy tótenshe jaǵdaı jarııalandy
PETROPAVL. QazAqparat – Petropavlda kóp qabatty turǵyn úıde gaz ballonynyń jarylýyna baılanysty jergilikti aýqymdaǵy tehnogendik sıpattaǵy tótenshe jaǵdaı jarııalandy, dep habarlaıdy QazAqparat tilshisi.
Petropavl qalasy ákimi Bolat Jumabekovtyń sheshimi ashyq normatıvti-quqyqtyq aktiler saıtynda jarııalandy.
Qujat Petropavldaǵy Internatsıonal kóshesi, 21 mekenjaıynda ornalasqan kópqabatty úıde bolǵan jarylystan úsh apta ótkesin ǵana paıda boldy. Túsindirme hatta qala ákiminiń sheshimi jarylys bolǵan kóppáterli turǵyn úı turǵyndarynyń qaýipsiz jáne jaıly turý jaǵdaılaryn qamtamasyz etý maqsatynda qabyldanǵany aıtylǵan.
«Negizgi mindet – ǵımarattyń buzylǵan qurylymdaryn qalpyna keltirý, turǵyn bólmelerge kúrdeli jáne aǵymdaǵy jóndeý júrgizý, jylýmen jabdyqtaý, sýmen jabdyqtaý jáne elektrmen jabdyqtaý júıelerin montajdaý jáne qaıta jańartý. Nátıjesinde, bul - Internatsıonal kóshesi, 21 turǵyn úıdiń bólmeleri men turmystyq úı-jaılarynyń jaı-kúıin jaqsartady», - delingen qujatta.
Petropavl qalasy ákiminiń orynbasary Asqar Habıbýlın tehnogendik sıpattaǵy tótenshe jaǵdaıdy joıý boıynsha jetekshi bolyp taǵaıyndaldy, oǵan tıisti is-sharalardy júrgizý tapsyrylǵan.
Esterińizge salaıyq, oqıǵa 21 aqpan kúni saǵat 16.00 shamasynda boldy. 5 qabatty úıdiń birinshi qabatynda ornalasqan dámhanada gaz ballony jarylyp, úsh adam qaza tapty. 120 adamdy qaýipsiz jerge shyǵarýǵa týra keldi.
SQO ákimi zardap shekkenderdiń eshqaısysy nazarsyz qalmaıtynyn, baspananyń jóndeletinen aıtty.
