Petropavlda tehnogendik sıpattaǵy tótenshe jaǵdaı jarııalanbaq

PETROPAVL. QazAqparat – Petropavldaǵy 2-shi jylý-elektr ortalyǵynda bolǵan apatqa baılanysty tehnogendik sıpattaǵy tótenshe jaǵdaı jarııalanbaq, dep habarlaıdy QazAqparat tilshisi.

Petropavl qalalyq ákimdigi ishki saıasat bóliminiń basshysy Azat Ibraevtyń aıtýynsha, ázirge jergilikti masshtabtaǵy tehnogendik sıpattaǵy tótenshe jaǵdaı jarııalanǵan joq. Sheshim 4 shilde kúni ótken qalalyq ákimdik janyndaǵy tótenshe jaǵdaılardyń aldyn alý jáne joıý jónindegi komıssııanyń otyrysynda qabyldandy. Bul sheshim ashyq normatıvtik-quqyqtyq aktiler portalynda qoǵam talqylaýyna salynǵan.

Tehnogendik sıpattaǵy tótenshe jaǵdaı jarııalaýdyń maqsaty – Petropavl 2-shi JEO bolǵan apat saldaryn joıý.

«Negizgi mindet – tótenshe jaǵdaıdyń yqtımal teris damýyna baǵalaý júrgizý, jylytý maýsymyn qaýipsiz ótkizý úshin qajetti sharalardy qoldaný, qajet bolǵan jaǵdaıda áleýmettik mańyzy bar nysandardy jylytý úshin qosymsha jabdyqtar satyp alý», - delingen qaýly jobasynda.

Esterińizge sala ketsek, bıyl 20 naýryz kúni Petropavl jylý ortalyǵynyń tútin murjalarynyń biri ishinara opyrylyp qulaǵan edi. Úıindiniń astynda qalǵan jumysshy qaıtys boldy . Qylmystyq is qozǵalyp, ortalyq dırektory men bas ınjeneri qamaýǵa alyndy . Tergeý amaldary áli aıaqtalǵan joq.

Sondaı-aq, Energetıka mınıstri Bolat Aqsholaqov Petropavldaǵy murjasy qulaǵan 2-JEO-da bolyp, nysandy kúrdeli jóndeýge 17,5 mlrd teńge qajet ekenin aıtty.

Al, jýyrda «Sevkazenergo» AQ tútin murjasyn bólshekteýge nege úsh adamnyń ǵana jumyldyrylǵanyna túsinik berdi .