Petropavlda tehnıkalyq qyzmet kórsetý ortalyǵy órtendi
PETROPAVL. QazAqparat – Petropavlda aýmaǵy 450 sharshy metr bolatyn tehnıkalyq qyzmet kórsetý ortalyǵy órtenip, júk kóligine zaqym keldi, dep habarlaıdy QazAqparat tilshisi.
SQO Tótenshe jaǵdaılar departamenti baspasóz qyzmetiniń málimetinshe, oqys oqıǵa 2 naýryz kúni túnde bolǵan. «101» qyzmetine Proselochnaıa 2 A meken jaıyndaǵy tehnıkalyq stansanyń janyp jatqandyǵy jóninde habar saǵat 21.08 mınýtta túsedi. Órt sóndirýshiler jetkende ǵımarat otqa oranǵan.
Órtti sóndirýge Petropavl qalasynyń bes órt sóndirý bólimshesi jumyldyryldy. Nátıjesinde saǵat 23.23 órt tolyǵymen sóndirildi.
Mamandardyń aıtýynsha, tehnıkalyq qyzmet kórsetý ortalyǵynyń jalpy aýmaǵy 450 sharshy metr, onyń 220 sharshy metri zaqymdaldy. Japsarlas salynǵan nysan, ǵımarattyń shatyry tolyǵymen janyp ketti. «GAZ-53» júk kóligine zaqym keldi.
Mamandardyń jedel qımylynyń arqasynda stansadan 2 ottegi ballony jáne 2 KAMAZ mashınasy shyǵaryldy.
Aldyn ala boljam boıynsha, órt peshti durys qoldanbaýdan shyǵýy múmkin.
