Petropavlda tehnıkalyq baıqaýdan ótpegen avtobýstar jolaýshy tasymaldaǵan
PETROPAVL. QazAqparat - Petropavlda jolaýshylar tasymalymen tehnıkalyq baıqaýdan ótpegen avtobýstar aınalysqan, dep habarlaıdy QazAqparat tilshisi.
SQO-da «Avtobýs» jedel-profılaktıkalyq sharasy ótti. Úsh kúnge sozylǵan reıd barysynda qoǵamdyq kólikterge qatysty kóptegen zań buzýshylyqtar anyqtalǵan.
«Reıd jolaýshylar qaýipsizdigin qamtamasyz etýge baǵyttalǵan. Úsh kún ishinde avtobýstardy zańsyz jolmen qaıta jabdyqtaýdyń 9 faktisi anyqtaldy. Olardyń barlyǵy basqa oblystarda tirkeýde turǵan kólikter», - dedi SQO Polıtsııa departamenti Jergilikti polıtsııa qyzmeti basqarmasynyń bastyǵy Aıdyn Baımatov.
Jalpy, qoǵamdyq kólikterdiń júrgizýshileri tarapynan barlyǵy 827 buzýshylyq anyqtalǵan.
«Avtobýstardyń arasynda baǵytqa shyqpas buryn tekseristen ótpeýdiń 10 faktisi jáne tehnıkalyq baıqaýdan ótpegen 18 avtobýs anyqtaldy. Qoǵamdyq kólikterdiń tehnıkalyq jaǵdaıyna nemquraıly qaraǵany úshin avtobýs parkteriniń 4 laýazymdy tulǵasy jaýapkershilikke tartyldy», - dedi basqarma basshysy.
SQO PD baspasóz qyzmetinen habarlanǵandaı, «Jolda qabyldaý» ekikúndik aktsııasy aıasynda da kólik quralyn qaıta jabdyqtaý boıynsha, ıaǵnı avtotıýnıng jasaǵysy keletinderden, avtobýstarynda jolaýshylar otyratyn oryndyqtar sanyn kóbeıtip, kólikterine gaz qurylǵysyn ornatqysy keletin júrgizýshilerden suraqtar kóp túsken.
Mamandardyń aıtýynsha, qaıta jabdyqtaýǵa ruqsat alý úshin SQO PD Ákimshilik polıtsııa basqarmasyna júginý qajet.
