Petropavlda teatr rejıseri spektaklge qajet qýyrshaqtardy ózi jasaıdy
Soltústik Qazaqstan oblystyq qýyrshaq teatrynyń bas rejısseri Grıgorıı Laıko spektaklge qajet qýyrshaqtardy ózi jasaıdy, akter retinde sahnaǵa da shyǵady. Birneshe mamandyqty jetik meńgergen ol búginde 300-den astam kásibı qýyrshaqtyń avtory, dep habarlaıdy Kazinform.
Grıgorıı Laıko qýyrshaqty jasap qana qoımaı, oǵan jan bitiredi. Onyń qolynan shyqqan qýyrshaqtardyń óz minezi, ereksheligi bar. Alǵash ret ol bul ónermen 30 jyl buryn, 8 jasynda tanysqan eken.
«Teatrdyń qýyrshaqtaryna degen qyzyǵýshylyq bala kezden paıda boldy. Buryn teledıdarda «Qýyrshaq teatry álemi» degen belgili akter Zınovıı Gerdt júrgizetin tamasha baǵdarlama bolatyn. Sol baǵdarlamanyń 4 serııasy qýyrshaqtardyń jasalý jolyna arnaldy. Baǵdarlamadan shabyttanyp, birneshe qýyrshaqty jasap shyqqan edim. Ol kezde, árıne jasalǵan qýyrshaqtyń sapasy jaıynda aıtpasa da túsinikti. Men teatr qýyrshaǵyn jasaýdy meńgerýdi maqsat ettim. Keıin qyzyǵýshylyǵym ózgerip, matematıka, fızıkaǵa den qoıdym. Biraq mektepti bitirisimen mádenıet kolledjine rejısserlik bólimge oqýǵa tústim. Keıin Máskeýdegi GITIS-ti teatr ártisi jáne rejısseri mamandyǵy boıynsha támamdadym. Sol jerde qýyrshaq teatryna basymdyq berilip, osy salanyń qyr-syryn meńgerdim. Kýrsta oqyp júrip Gollandııa rejısseri Dýda Paıvanyń qoıylymyn kórip, qýyrshaq teatry ónerine ǵashyq boldym. Bar ǵumyrymdy osy salaǵa arnaımyn dep sheshtim», - deıdi Grıgorıı Laıko.
Sheberdiń aıtýynsha, bir qýyrshaqty jasaýǵa keıde aılap ýaqyt ketedi. Berik, tózimdi bolýy úshin aǵashty, sonyń ishinde qaıyń men jókeni qoldanady. Qazir Grıgorıı qýyrshaqtar ǵana emes, qajetti nysandardy, mehanıkalandyrylǵan dekoratsııalardy da jasaıdy.
«Oqyp júrip Máskeýdegi Baýman teatryna jumysqa ornalastym. Úshinshi kýrsta sheber Aleksandr Maksımochev jáne sýretshi Tatıana Melnıkovamen tanystym. Olar birge jumys istedi. Aleksandr qýyrshaqtyń músinin aǵashtan jasap, mehanıkasymen aınalyssa, ony árleý, kıimin tigý Tatıananyń mindeti edi. Biz birge qoıylymdy sahnaladyq. Sol joly 30 qýyrshaqty paıdalandyq, bul úlken jumys boldy. Kóp tájirıbe aldym», - deıdi Grıgorıı Laıko.
2013 jyly jas rejısserdiń «Kúmis tuıaq» atty alǵashqy spektakli kórermenge jol tartty. Ol qoıylym SQO qýyrshaq teatrynda sahnalandy.
«Ózim rejısser, ári akter bolǵandyqtan qýyrshaǵymdy jetildirdim, bul meniń avtorlyq ónertabysym deýge bolady, qýyrshaqty bir qolmen basqarýǵa bolady. ıAǵnı ártis sahnada eki-úsh qýyrshaqpen qatar jumys isteı alady», - deıdi rejısser.
Mamannyń aıtýynsha, teatr qýyrshaǵynyń túri kóp, ártistiń basqarýyna qaraı marıonetka, sharnırli nemese planshetti qýyrshaq, adam boıymen birdeı jáne qolǵap qýyrshaqtar bar. Búginde onyń qolynan shyqqan qýyrshaqtardyń sany 300-den asqan.
