Petropavlda táýlikke jalǵa beriletin páterlerge qatysty talap kúsheıtilmek
PETROPAVL. KAZINFORM – Jyl basynan beri Petropavlda tynyshtyqty buzǵany úshin 688 adam ákimshilik jaýapkershilikke tartyldy. Onyń ishinde 151 derek táýliktik jalǵa beriletin páterlerge qatysty.
Soltústik Qazaqstan oblystyq polıtsııa departamenti baspasóz qyzmetiniń málimetinshe, tynyshtyqty buzý derekteri artqan. Táýlikke jalǵa beriletin páterler ádette túrli merekelik basqosýlar men shýly keshter ótkizý úshin jıi paıdalanylady. Turǵyndardan kelip túsetin shaǵymdardyń basym bóligi de osyndaı nysandarǵa qatysty.
Sońǵy jaǵdaılardyń biri Bóketov kóshesinde táýlikke jalǵa beriletin páterlerdiń birinde boldy. Munda jastar toby túngi ýaqytta qatty shýlap, jumys kúninen keıin demalýǵa tyrysqan kórshilerdiń mazasyn alǵan. Turǵyndar tártip saqshylaryn shaqyrýǵa májbúr boldy.
Osy máselege baılanysty Petropavl qalalyq polıtsııa basqarmasynyń bastyǵy Serik Áljanov páter jaldaý bıýrolarynyń ókilderimen arnaıy kezdesý ótkizdi. Jıyn barysynda jalǵa alýshylardy baqylaýdy kúsheıtý, turǵyndardyń tynyshtyǵyn saqtaý jáne qoldanystaǵy zańnama talaptarynyń oryndalýyn qamtamasyz etý máseleleri qaraldy.
Quqyq qorǵaý organdarynyń málimetinshe, jyl basynan beri quqyq buzýshylyqtardyń jıi qaıtalanýyna baılanysty páterlerdi jalǵa berýmen aınalysatyn alty bıýronyń atyna quqyq buzýshylyqtarǵa yqpal etetin sebepter men jaǵdaılardy joıý jóninde arnaıy usynymdar joldanǵan.
Kezdesý qorytyndysynda páter jaldaý naryǵy ókilderine azamattardy ornalastyrý kezinde baqylaýdy kúsheıtý, jalǵa alýshylarmen túsindirý jumystaryn júrgizý jáne olardyń turý qaǵıdalaryn saqtaýyn qamtamasyz etý usynyldy.
Buǵan deıin Jetisýda tynyshtyqty buzǵan turǵyndar 40 mıllıon teńgeden astam aıyppul tólegenin jazǵan edik.
