Petropavlda «Tátti kitap» festıvali ótti
PETROPAVL. QazAqparat - Petropavlda «Tátti kitap» festıvali ótti. Qatysýshylar ózderiniń súıikti kitaptary pishininde torttar men tátti bálishter pisirýden synǵa tústi. Uıymdastyrýshylar osylaısha balalardyń kitap oqýǵa degen qyzyǵýshylyǵyn arttyrmaqshy bolǵan, dep habarlaıdy QazAqparat tilshisi.
Kitap - rýhanı azyq. Alaıda, festıvalge qatysýshylar bul joly odan gastronomııalyq raqat alýǵa tyrysty.
Erekshe baıqaýǵa barlyǵy 15 top, 75 adam qatysty. Ár topta bir synyptyń 3 oqýshysy, ata-ana men jetekshisi. Olarǵa qoıylǵan basty talap - kitap pishininde tort, toqash, ne bálish pisirý. Pisirip qana qoımaı, tátti-dámdilerin qazylar alqasyna ádemilep usynýlary kerek boldy.
«Bizdiń oqýshy mindetti túrde 100 kitap oqyp shyǵýy kerek. Onyń arnaıy belgilengen tizimi bar. Qazaq, aǵylshyn, orys tilderinde. Bul jolǵy festıval osy «100 kitap» jobasy aıasynda uıymdastyryldy. Oqýshylar ózderi oqyǵan, unaǵan kitap pishininde tort pisirip, keıin shyǵarmaǵa baılanysty qoıylǵan suraqtarǵa jaýap beredi. Balalardyń kitap oqýǵa qumarlyǵyn arttyrý maqsatynda «Bookcrossing» jobasyn da uıymdastyrdyq. ıAǵnı, oqyǵan kitapty sórege shań bastyryp qoımaı, ekinshi adamǵa syılaý», - deıdi mektep muǵalimi Sáýle Ýálıeva.
Baıqaýda pisirilgen eń úlken torttyń salmaǵy - 10 keli. Alaıda basymdyq onyń salmaǵyna emes, ásem bezendirilýine jáne ázirleý tehnologııasynyń saqtalýyna berildi. Balalardyń bilimi de nazardan tys qalmady.
«Esil» komandasy torttyń betine Berdibek Soqpaqbaevtyń «Meniń atym Qoja» kitabynyń muqabasyn beıneledi. Top múshesi, oqýshynyń ákesi Mádı Qurmashevtiń aıtýynsha, mamandyǵy aspaz bolǵanymen, mundaı kondıterlik ónimdi alǵash ázirleýi. «Esh qıyndyǵy joq eken. Bıskvıtterdi ázirlep alyp, túrli ıngredıentterden balqaımaq jasadyq. Árbir áripti kestik. Túrli taǵam pisirýdiń mamany bolsam da, búgin ózime biraz tájirıbe jınadym», - deıdi Mádı.
Nátıjesinde, osy «Esil» toby baıqaýdyń bas júldesine ıe boldy.
