Petropavlda tasyǵan sýdyń deńgeıi azaıdy
PETROPAVL. QazAqparat - Esil ózeninde barlyq gıdrobeketterdegi sýdyń deńgeıi tómendedi, dep habarlaıdy «QazAqparat» HAA tilshisi.
Oblys ákiminiń orynbasary Anton Fedıaevtiń aqparaty boıynsha, Sergeev sý qoımasynyń tolýy - 120%, Petropavl sý qoımasyniki - 114% quraıdy. «Sý tasqynynyń bastapqy kezeńinde Sergeev sý qoımasyna quıylǵan sý 4,45 mlrd tekshe metrdi qurap, onyń kólemin 6 esege molaıtty. Sý qoımasynyń jobalyq qýattylyǵy - 693 mln tekshe metrdi quraıdy. Petropavl sý qoımasyndaǵy sýdyń eń joǵary kórsetkishi 6 mamyr kúni tirkeldi. Sol sátten bastap tómendep keledi. Qazirgi tańda onyń deńgeıi 41 sm quraıdy. Ary qaraı da táýligine 15-20 santımetrge tómendeıdi dep kútilýde. 8 mamyr kúni Dolmatovo aýylynda eń joǵary kórsetkish tirkeldi», - dedi Anton Fedıaev.
234 úı sý astynda qaldy. Prıbrejnoe aýylynda joldaǵy tasqyn sýlar ketip jatyr. Qaıyqpen júrý qıyndyq týǵyzýda. Taıaý kúnderi jergilikti bılik ótkizilimi joǵary tehnıkany iske qosýdy josparlap otyr.
Anton Fedıaevtiń aqparaty boıynsha, eldi mekenderden sý ketkennen keıin, sý aıdaý jumystary bastalady. «Bizde qajetti sorǵysh tehnıkalar bar. Qazir biz ónimdiligi joǵary 10 sorǵyshty alý jumystaryn júrgizýdemiz. Olardy taıaý ýaqytta alamyz. Sý aıdaıtyn tehnıkalar jetkilikti», - dedi oblys ákiminiń orynbasary.
Sý tasqyny kezeńinde barlyǵy 380 úı zardap shekti.
