Petropavlda tasqynnan zardap shekkenderge qarjylaı kómek kórsetilip jatyr
PETROPAVL. QazAqparat – Petropavlda kóktemgi sý tasqynynan úıleri men qora-jaılary sý astynda qalǵandarǵa jalpy somasy 40 mln teńge qarjylaı kómek beriledi, dep habarlaıdy QazAqparat tilshisi.
Qazaqstannyń Qyzyl Aı qoǵamy Bolat Ótemuratov Qorymen birge sý tasqynynan zardap shekkenderge kómek kórsetip jatyr. Qaıyrymdylyq sharasy eki kezeńmen júzege asyrylady. Petropavlda 136 otbasyǵa 23 mln astam teńge alǵan bolsa, endi 108 otbasyǵa 16 mln 350 myń teńge berilip jatyr.
«Kómek kartasy» jobasy Petropavlda ekinshi jyl qatarynan ótkizilýde. Bul qarajatty zardap shekkender sýdan búlingen úılerin jóndeýge, múlkin qalpyna keltirýge jumsaıdy. Alǵashqy qajettiliktegi taýar men azyq-túlik ala alady. Buǵan deıin biz turǵyndardan aryzdar qabyldap, jaǵdaılaryn baǵaladyq. Tizimdi jasaýǵa saıajaı qoǵamdastyqtary, Tótenshe jaǵdaılar departamentiniń mamandary kómektesti», - deıdi «Qazaqstannyń Qyzyl Aı Qoǵamy» SQOF dırektory Sáýle Orazova.
«Kómek kartalaryn» joba erejesine saı baspanalary zaqymdalǵan adamdar, jalǵyzbasty zeınetkerler, múgedekter, jalǵyzilikti analar men turmysy nashar kóp balaly otbasylar alady.
Sáýle Orazovanyń aıtýynsha, Petropavlda bul joly járdemaqy alǵandardyń ishinde 9 balasy bar otbasylar da boldy. Qarajat ár otbasy múshesine 50 myń teńgeden berildi. Fılıal dırektory járdemaqy olarǵa jaqsy kómek bolady degen úmitte.
Soltústik Qazaqstan oblysynda byltyr kóktemde 284 adamǵa 8 mln 520 myń teńge berildi. Bıyl Qor tasqyn sýdan zardap shekken 791 adamdy qamtyp, 40 mln jýyq teńgeni úlestirmek.
