Petropavlda tasqynnan zardap shekkenderge jańa 51 úı paıdalanýǵa berildi
PETROPAVL. KAZINFORM – Petropavldaǵy «Birlik» shaǵyn aýdanynda boı kótergen jańa 51 úı tasqynnan zardap shekken otbasylarǵa berildi.
Soltústik Qazaqstan oblysy ákimi baspasóz qyzmetiniń málimetinshe, búgin paıdalanýǵa berilgen úıler «Qazaqmys» korporatsııasynyń qarjysyna salyndy. Korporatsııa barlyǵy 100 úıdiń qurylysyn qarjylandyrdy. SQO ákimi Ǵaýez Nurmuhambetov pen korporatsııanyń basqarma tóraǵasy Nurahmet Nurıev petropavldyqtar - Baýyrjan Amırov, Aleksandr Mıhaılenko jáne Sergeı Taradenkovtyń shańyraǵyna baryp, qonystoımen quttyqtady.
«Búgingi tańda «Birlik» shaǵyn aýdanynda 151 otbasy jańa úıge qonystandy. 549 úı áli salynyp jatyr. Olar qurylys kestesine saı aıaqtalady. Jumys sapasyna qurylys kompanııasy men tehnıkalyq baqylaý tikeleı jaýapty. Qurylysshylar jańa úılerge eki jyl kepildik beredi. Aqaýlar anyqtalsa, óz esebinen ony joıady», - dedi Ǵaýez Nurmuhambetov.
Budan bólek tasqynnan zardap shekkenderge baspana satyp alý jumystary da júrgizilip jatyr. Búgingi tańda 605 otbasy páter kiltine ıe boldy.
Buǵan deıin Petropavlda qatty jaibyr jaýyp, saldarynan turǵyn úılerge sý kirgenin jazǵan edik.
