Petropavlda tasqynnan zardap shekkenderge berilgen úıdiń qabyrǵasy sógilip tur
PETROPAVL. KAZINFORM – Petropavldaǵy «Birlik» shaǵyn aýdanynyń turǵyny Maksım Chernıkov jańa baspanasynyń syıqyn kórsetip, shaǵymdandy.
Áleýmettik jelide taraǵan vıdeoda qala turǵyny qabyrǵadaǵy jaryqtardyń bıyl sáýir aıynda paıda bolǵanyn aıtty. Er adam shytynaǵan qabyrǵa kez kelgen ýaqytta qulap kete me dep qaýiptenedi. https://www.facebook.com/reel/1587391139103074
- Mamyr aıynan bastap qurylysty júrgizgen merdigerge habarlasyp jatyrmyn. «Kelemiz, istep beremiz» dep qury ýáde etedi. Kelesi jyly bul úıdiń kepildik merzimi bitedi. Eshkim kelgen joq, eshkim jaǵdaıymyzdy bilmedi, - deıdi Maksım Chernıkov.
2024 jyly «Birlik» shaǵynaýdanynda sý tasqynynan zardap shekken otbasylar úshin qysqa merzimde 700 turǵyn úı salynyp, paıdalanýǵa berildi.
Petropavl qalalyq ákimdiginiń málimetinshe, barlyq úıge eki jyldyq kepildik berilgen. Osy ýaqyt ishinde merdiger kompanııalar anyqtalǵan kez kelgen aqaýdy tegin jóndeýge mindetti.
Búgin qala ákimi Serik Muhamedıev osy shaǵyn aýdanǵa baryp, Maksım Chernıkovtyń úıin kórdi.
- Qandaı baspana bolmasyn kútimdi qajet etedi. Desek te, qurylysshylardyń jumysyna qatysty da syn bar. Birqatar kompanııa ózderi turǵyzǵan úılerdi únemi baqylaýda ustap otyr. Al bul úıge turǵyndar Qyzyljar aýdanynan sý tasqynynan keıin qonys aýdardy. Buǵan deıin shaǵym bolmady. Qazir qarap shyqtyq. Jóndep, qalpyna keltirýge bolady, - deıdi Serik Muhamedıev.
Petropavl ákimi jóndeý jumystarynyń búgin-erteń bastalatynyn aıtty.
- Qazan aıynyń basynda osy shaǵyn aýdanda ákimderdiń kóshpeli qabyldaýyn ótkizdik. Biraq ol joly eki adam ǵana kezdesýge keldi. «Birlik» shaǵyn aýdanynyń ortaq chaty bar, biz de onda otyrmyz, - deıdi Serik Muhamedıev.
Buǵan deıin jyl saıyn sý basatyn Petropavldaǵy Zarechnyı kenti turǵyndary qashan kóshiriletinin jazǵan edik.