Petropavlda tasqynnan zardap shekkenderge baspana salýǵa 30-ǵa jýyq merdiger kompanııa jumyldyrylǵan
PETROPAVL. KAZINFORM – Petropavlda tasqynnan zardap shekkenderge baspana salynyp jatqan «Birlik» shaǵyn aýdanynda qurylys qyzǵan. Mamandar kesteden qalmaý úshin jaýynsyz ár ashyq kúndi tıimdi paıdalanýǵa tyrysty. Óıtkeni úılerdi sýyq túskenshe paıdalanýǵa berý mindeti tur.
«Birlik» shaǵyn aýdanynda tasqynnan zardap shekkenderge salynýy tıis 700 úıdiń barlyǵynyń irgetasy búginde quıylǵan. Osy kúnge deıin 250-ge jýyǵy tapsyryldy, birer kúnde taǵy elý otbasy qonys toıyn toılamaq.
«Bizdiń mindetimiz – turǵyndarǵa bekitilgen kestege saı baspanalardy merziminde berý. Sol sebepti de osy shaǵyn aýdan tańdap alynǵan edi, óıtkeni munda jol, sý jelisi tartylǵan. Qurylysqa qazaqstandyq ónim, sonyń ishinde jergilikti qurylys materıaldary qolanylyp jatyr. Máselen, gaz bloktary petropavlda, kirpish Qyzyljar aýdanynda shyǵarylady. Sondaı-aq túrli qurǵaq qospalar da jergilikti kásiporyndardyki. Ózimizde joq, negizinen metaldan jasalǵan materıaldy elimizdiń basqa óńirlerinen ýaqytynda jetkizip jatyrmyz. Bul da jumystyń tez júrýine septigin tıgizedi. Al sapasyna keler bolsaq, qurylys alańdarynda tehnıkalyq, avtorlyq baqylaý bar. Mamandar kúndelikti osy jerde, qurylystyń barysyn nazarda ustap otyr. Olqylyq anyqtalǵan jaǵdaıda merdiger ony joıýǵa mindetteledi. Jalpy baspanalardyń 2 kepildik merzimi bar», - deıdi Soltústik Qazaqstan oblysy Qurylys, sáýlet jáne qala qurylysy basqarmasy basshysynyń orynbasary Serikjan Shıtqanov.
Qazirgi ýaqytta baspana turǵyzýǵa 27 merdiger kompanııa tartylǵan. Mamannyń aıtýynsha, «Birlik» shaǵyn aýdanynda jalpy 2,5 myń ýchaske bolady, ıaǵnı tasqynnan zardap shekkenderden basqa Petropavlda jeke turǵyn úı salýǵa jer ýchaskesine kezekte turǵandarǵa da osy aýdannan 10 sotyq beriledi. Joba boıynsha mektep, balabaqsha, saýda oryndary, gúlzarlar, aýrýhana boı kóteredi.
90 orynǵa shaqtalǵan balabaqsha qurylysy 15 qyrkúıekke deıin aıaqtalýy tıis. Nysandy «Mıras GROUP» JShS turǵyzyp jatyr.
«Qurylys alańynda 3 tehnıka, 30-dan astam adam jumys istep jatyr. Ǵımarattyń qabyrǵasy qazir 60 % qalandy. Balabaqsha bir qabatty bolady. Kesteden qalmaı kele jatyrmyz», - deıdi ýchaske bastyǵy Farhat Seıpilov.
