Petropavlda tasqynnan zardap shekkenderge arnap salynǵan 50 úı birer kúnde paıdalanýǵa beriledi
PETROPAVL. KAZINFORM – Petropavldaǵy «Solnechnyı-2» shaǵyn aýdanynda salynyp jatqan úılerdiń alǵashqy legi 5 maýsym kúni paıdalanýǵa beriledi dep josparlanǵan. Bir tıpti baspanalarǵa tasqynnan zardap shekkender ornalasady.
Petropavldaǵy «Solnechnyı-2» shaǵyn aýdany osydan 5-6 apta buryn jazyq dala bolsa, qazir qaz-qatar tizilgen jańa úılerden kóz súrinedi. Syrttan kelgen adamnyń mundaǵy qarbalas jumysty qumyrsqanyń ıleýine uqsatary sózsiz.
Shaǵyn aýdanda qurylys 24 sáýir kúni bastaldy. Myna úıler sodan beri atqarylǵan jumystyń nátıjesi. Іshki árleý jumysy aıaqtalýǵa jaqyn. Sýy ishke kirgizilgen, elektr qýaty tartylǵan.
Birer kúnde bul úılerge alǵashqy qonystanýshylar ornalasady.
Jumysshylardyń bir bóligi eldi mekendi abattandyrýmen aınalysyp jatyr. Myna jerde basketbol, vorkaýt jáne balalardyń oıyn alańdary ornalaspaq.
Soltústik Qazaqstan oblystyq qurylys, sáýlet jáne qala qurylysy basqarmasynyń málimetinshe, qazirgi ýaqytta shaǵyn aýdanda tasqynnan zardap shekkender úshin 700 úıdiń qurylysy júrip jatyr.
«Bul aýdanda qurylys sáýirdiń 24-i bastaldy. Mamyrdyń 8-i kúni taǵy 100 úıdiń qurylysy bastaldy. Taǵy 300 úıde jumys 30% aıaqtalǵan. Jalpy qazir 500 úıdiń qurylysynda 1200 adam jumys istep jatyr. 50-60 tehnıka tartylǵan.
Jalpy bul aýdandaǵy qurylysqa 23 merdiger kompanııa jumyldyrylǵan. Sonyń 21-i – jergilikti, bireýi - Temirtaýdan, ekinshisi Astanadan kelgen», - deıdi basqarmanyń baspasóz hatshysy Maıgúl Elemesova.
Astanadan kelgen «Integra Construction KZ» JShS-i tamyz aıynyń sońyna deıin 400 úıdi paıdalanýǵa berýi tıis. Kompanııa úsh qabattan turatyn panelderdi qoldanyp jatyr. Qurylys materıaly Astanadan ákelinip, alańda daıyn irgetastyń ústine konstrýktor sııaqty qurastyrylady.
Seriktestik ókilderiniń aıtýynsha, mundaı úıler jyly, ári dybysty jaqsy oqshaýlaıdy, sondaı-aq qazirgi ýaqytta eń qajetti basymdyq – tez salynady.
Buǵan deıin «Solnechnyı-2» shaǵyn aýdanynda 90 balaǵa shaqtalǵan balabaqshanyń qurylysy bastalǵanyn aıtqan edik.
