Petropavlda tasqynnan zardap shekken taǵy 47 otbasy jańa baspanaǵa kirdi
PETROPAVL. KAZINFORM – Petropavldaǵy «Birlik» shaǵyn aýdanynda sý tasqynynan zardap shekken 47 otbasyǵa búgin saltanatty túrde jańa úılerdiń kilti tabys etildi.
Búgin Soltústik Qazaqstan oblysyna premer-mınıstrdiń orynbasary Qanat Bozymbaev keldi. Maqsat – Memleket basshysynyń tapsyrmasy boıynsha tasqynnan zardap shekken turǵyndarǵa salynyp jatqan jáne jóndelgen úılerdiń sapasyn kórý. Sapar barysynda zardap shekken Beskól aýylynda, Petropavldaǵy shaǵyn aýdandar bolyp, turǵyndarmen kezdesti.
Keıin «Birlik» shaǵyn aýdanynda bolyp, kóptiń qýanyshyna ortaqtasty. Búgin taǵy 47 otbasy jańadan salynǵan baspanaǵa kirdi.
«Buryn Hromzaýyt shaǵyn aýdanynda turdyq. Tasqynnan úıimizdiń bir qabyrǵasy qulap qaldy. Apatty dep, jóndeýge bolmaıtynyn aıtty. Endi qaıda baramyz, dalada qaldyq dep ýaıymdadyq. Búgin qatty qýanyp jatyrmyz. Úı unady, jaqsy. Otbasynda alty jan bar. Joldasym osy aıdyń sońynda zeınetke shyǵady. Osy shańyraqta úlken toı bolady», - deıdi qonys toı ıesi Ǵalııa Hamzına.
Jospar boıynsha «Birlik» shaǵyn aýdanyndaǵy úıler 1 qyrkúıekke deıin paıdalanýǵa berilýi tıis.
«Birlik» shaǵyn aýdanynda 700 úı demeýshilerdiń qarjysyna turǵyzylady. 1300 baspanany satyp alatyn bolamyz. Qazirdiń ózinde 300-den astam úı-páter satyp alyndy. Oblystyq ákimdiktiń qorynda da, metsenattar bólgen qarajat jetkilikti. 1 shildege deıin jergilikti ákimdik baspana satyp alýǵa qatysty jumysty aıaqtaıdy. Al qurylysy júrip jatqan úıler 1 qyrkúıekke deıin salynyp bolady. Másele týyndaǵan jaǵdaıda 1 qazanǵa deıin úılerdi tapsyrady. Sapasyn baqylaýda ustaý úshin komıssııa qurylǵan. Men aı saıyn kelip, jaǵdaıdy bilip otyramyn, turǵyndardan túsken ár shaǵym nazardan tys qalmaıdy. Jaqynda bul shaǵyn aýdanǵa avtobýstar júre bastaıdy. Aıaldamalar salynady. Balabaqsha qurylysy júrip jatyr. 1,5 km jerde mektep bar. Kelesi jyly ishindegi joldarǵa tolyq asfalt tóseledi», - dedi Qanat Bozymbaev.
Óńirde tasqyn kezinde zaqymdanǵan ǵımarattardy baǵalaý, úılerdi zertteý jumysy aıaqtalýǵa jaqyn.
«SQO-da 4 myńnan astam úı sý astynda qalsa, onyń jartysy apatty dep tanyldy. ıAǵnı jergilikti atqarýshy bılikke osynsha úıdi salý kerek nemese satyp alý qajet. Eki myńǵa jýyq úıdi jóndep, qalpyna keltirý mindeti de tur. Beskól aýylynda buǵan deıin másele boldy, qazirgi ýaqytta ol sheshildi. Baǵalaý durys júrgizilmegen úılerdi mamandar qaıta baǵalady. Keıbirine basqa úı alynatyn boldy. Budan bólek elektr jelisin, ınfraqurylymdy jáne sýmen qamtý júıesin qaıta qalpyna keltirý jumysy tur. Qajetti qarajat bólinip jatyr, ákimdik jobalyq-smetalyq qujattardy daıyndap jatyr. Bul jumysqa oblystyq bıýdjettiń shamasy jetpese, respýblıkalyq qazynadan qarajat bólip, kómektesemiz. Soltústik óńirde jaz qysqa, sondyqtan bul ýaqytty tıimdi paıdalanýymyz kerek», - dedi Qanat Bozymbaev.
Esterińizge salaıyq, 6 maýsym kúni «Birlik» shaǵyn aýdanynda bes aptanyń ishinde boı kótergen úılerdiń alǵashqy 53-i saltanatty túrde tapsyrylǵan edi.
