Petropavlda tártip saqshylary jańa rejımge aýystyryldy
PETROPAVL. QazAqparat - Petropavl qalasy polıtsııasynyń keshendi kúshteri patrýldeýdiń úsh aýysymdy rejımine kóshti, dep habarlaıdy «QazAqparat» HAA tilshisi SQO ІІD baspasóz qyzmetine silteme jasap.
Polıtseılik narıadtardy aýystyrýdy oblystyq ІІD bastyǵy, general-maıor Berik Bilálov júrgizdi.
Petropavlda tártip saqtaý sharalaryn polıtsııanyń keshendi kúshteri qamtamasyz etedi. Jergilikti polıtsııa qyzmeti, qalalyq jáne oblystyq polıtsııa vedomstvolary apparatynyń qyzmetkerleri, jekemenshik kúzet agenttikteriniń ókilderi men Ulttyq gvardııanyń áskerı qyzmetshileri qalany kúndelikti patrýldeýge kirisedi. Polıtsııa vedomstvosynyń basshysy ár jasaqtyń daıyndyǵyn, jolkezý baǵyttary men qujattardy tekserdi.
Endi jaıaý jáne avto patrýlderdi polıtsııa ofıtserleri basqarmaq jáne olar oıyn-saýyq ortalyqtaryna, kóńil kóterý, bilim berý mekemelerine jaqyn ornalasatyn bolady.
«Jumys úsh mezgildi rejımde uıymdastyrylady. Kúndelikti qyzmetti uıymdastyrý ІІD bastyǵy orynbasarlarynyń jeke jaýapkerlshiligine júkteledi. Jekemenshik kúzet agenttikteri qyzmetkerleriniń baǵyttaryn retteý jańa ózgeristerdiń mańyzdy bóligi boldy. Olar qalanyń turmyspen qamtıtyn strategııalyq nysandarynyń mańynda patrýldeýdi iske asyrmaq», - dep atap ótti polıtsııa vedomstvosynyń baspasóz qyzmeti.
Berik Bilálov patrýlderdiń beınejetondarynyń qyzmeti men durystyǵyn jeke ózi tekserdi. Aýysym barysynda olar árbir quqyq buzýshylyqty, kólikti toqtatý jáne t.b. jaǵdaılardy ýaqytyna saı jazyp otyrýlary qajet.
Jeke quram boıynsha komendattyq baqylaýdy kúsheıtý tártipti ustaýdyń mańyzdy faktory. Komendanttyq patrýl quramyna kiretin qyzmetkerlerge qalanyń kóńil kóteretin mekemelerin tekserý jóninde tapsyrmalar berilgen.
