Petropavlda taǵy apat bolyp, qala turǵyndary sýsyz qaldy
Qaladaǵy M. Jumabaev kóshesinde sý qubyry qaıta jaryldy. Apat ornynda túsirilgen vıdeo áleýmettik jelide lezde tarap ketti.
Káriz qudyqtarynan tasyp, aǵyp jatqan sý birden kósheni alyp, jeke sektordaǵy turǵyn úılerge qaýip tóndirdi. Turǵyndardyń aıtýynsha, qazirgi ýaqytta oblys ortalyǵynyń birqatar aýdanynda sý joq.
Oqıǵa ornynda Petropavl ákimi Rýslan Ańbaev ta júr.
«M.Jumabaev kóshesinde sý qubyry jaryldy. «Qyzyljar Sý» JShS-nyń avarııalyq brıgadasy jumys istep jatyr. Qazir dalaǵa aqqan sý toqtatyldy, mamandar sebebin anyqtaýda. Qalanyń basym bóliginde sý berý qysymy tómendetildi.
Osy aýdandaǵy 15 úıde qazirgi ýaqytta sý joq. Sondaı-aq oblystyq balalar aýrýhanasy, beıimdeý ortalyǵy, Petropavl nan-toqash kombınaty men «Sevkazenergo» AQ sýsyz otyr», - dep jazdy áleýmettik jelidegi jeke paraqshasynda Rýslan Ańbaev.
Ákimniń aıtýynsha, qala sýsyz qalmaıdy. Aldaǵy birneshe saǵatta qubyrdaǵy qysym birtindep kóteriledi. Al apat bolǵan aýdan turǵyndary men áleýmettik nysandarǵa sý jetkiziletin bolady.
«Qyzyljar Sý» JShS de oqıǵaǵa qatysty túsinik berdi.
«Búgin saǵat 18:15 shamasynda M.Jumabaev – S. Muqanov kósheleriniń boıynda D=800 mm sý qubyry jaryldy. Aldyn ala boljam boıynsha eki qubyr jalǵanǵan jer ashylyp ketken, bul qurylys kezinde jiberilgen aqaý bolýy múmkin.
Osyǵan oraı sý júıesinde qala boıynsha qysym tómendetildi. Qazirgi ýaqytta apatty joıý boıynsha jumystar júrgizilip jatyr. Magıstraldi tıekter jabylǵannan keıin apat bolǵan aýdannan basqa jerlerge sý berý qalpyna keltiriledi.
«Kásiporyn barynsha qysqa ýaqytta sý qubyryn qalpyna keltirýge tyrysady», - dedi «Qyzyljas Sý» JShS bas dırektory J. Sultanov.
Petropavlda qarasha aıynyń basynda ǵana sý jelisinde iri apat bolyp, qala birneshe saǵatqa sýdan ajyratylǵan edi.
Foto: instagram.com/ruslan_anbaev