Petropavlda taǵy 150 úı buzylady

PETROPAVL. QazAqparat - Petropavldyń kireberisinde boı kóterip jatqan «Jas Órken» shaǵyn aýdanynyń qurylysy jalǵasyp jatyr, dep habarlaıdy QazAqparat tilshisi. 

Soltústik Qazaqstan oblysynyń ákimi Qumar Aqsaqalov qurylys alańyna baryp, jumystyń qarqynyn synǵa aldy. Óńir basshysy Qazaqstannyń soltústigindegi qurylys maýsymy birshama qysqa bolǵandyqtan, árbir kúndi tıimdi paıdalanyp, eki aýysymmen jumys isteý qajet ekenin qadap aıtty.

Shaǵyn aýdandaǵy 10 turǵyn úı kesheninde 10 myń páter halyq ıgiligine berilýi tıis. Qazir úıler men áleýmettik nysandardyń qurylysy júrip jatyr. Jańa ǵımarattardyń boı kóterýi úshin jekemenshik sektorǵa tıesili úıler buzylady.

Petropavl ákimi Marat Tasmaǵanbetovtiń aıtýynsha, qazirge deıin 640-tan astam úı buzylǵan. Qala basshynyń málimdeýinshe, ol úılerdiń ıelerine aqshalaı ótemaqy nemese eski úıine saı jańa baspana usynylady. Turǵyndardyń barlyǵy jańa páterdi tańdap otyr.

Bul shaǵyn aýdandaǵy úıler 1950-jyldary salynǵan. Olardyń quny shamamen 8 mıllıon teńge aınalasynda baǵalanyp otyr. Petropavlda bul aqshaǵa keńdigi dál osyndaı baspana satyp alý múmkin emes.

«Jalpy alǵanda, bir kvartalda 40 úı salynady. Bolashaqty eskersek, aýrýhana salý úshin kem degende 87 úı, mektep úshin 60 úıdi buzý qajet. Aýrýhanany 8-mektepke jaqyn mańdaǵy ýchaskege salamyz dep josparlap otyrmyz. Sonda kommertsııalyq nysandardy buzýdyń qajeti bolmaıdy», - deıdi M. Tasmaǵanbetov.

Qumar Aqsaqalov keler jyly ekinshi jeliniń - jekeshelendirý quqyǵynsyz jalǵa beriletin úılerdiń qurylysyna kirisý qajettigin aıtty.

«Eski úılerdi buzý arqyly qala turǵyndarynyń ómirin jaqsartamyz. Olardyń ornyna 2,5-3 ese kóp páter salynady. Bul qalanyń ósimi úshin tıimdi», - deıdi oblys ákimi.