Petropavlda súıekterdiń shyǵyp jatqanyna qaramastan eski zırattyń ústinde qurylys júrip jatyr

Áleýmettik jelide ekskavator júrgizýshisiniń beınejazbasy tarady. Onyń aıtýynsha, tehnıkanyń kómegimen tabyttardy kóterip shyǵarǵan. 

- Myna jerde bir ǵana emes, birneshe tabyt bar eken. Jigitter meniń kómegimmen besinshi tabyttan súıekterdi shyǵaryp jatyr. Qudaı ózi keshirsin. Qap súıekke toldy. 

Qazyp jatyrmyz, ana jerde turǵan birneshe qap súıek búgin jınaldy. Men ekskavatordyń shómishimen alyp shyǵamyn. Ana jigit shyqqan súıekterdi terip, qapqa salady. Múmkindiginshe tazalaıdy. Túnde qalaı uıyqtaıdy eken, - deıdi beınejazba ıesi. 

Petropavldyń taǵy bir turǵyny qurylys júrip jatqan orynǵa arnaıy barǵan. Aıtýynsha, kireberiste nysannyń aqparattyq qujaty joq. 

- Adamdar arnaıy quraldarsyz jumys istep jatyr. Qaıta jerleý rásiminiń óz talaptary bar jáne ol saqtalý kerek, - deıdi er adam. 

Nysan Soltústik Qazaqstan oblysy ákimdigi Qurylys basqarmasynyń tapsyrysymen salynyp jatyr. 

Petropavl qalalyq ákimdiginiń málimetinshe, jazbada aıtylǵan eskertýler, onyń ishinde qaýipsizdik tehnıkasy talaptarynyń saqtalýyna qatysty aqparat tıisti sharalar qabyldaý úshin tapsyrys berýshige joldandy.

- Jer qazý jumystary barysynda tabylǵan adam súıekterine qatysty qala ákimdigi janynan qaıta jerleý máseleleri jónindegi arnaıy komıssııa quryldy. Tabylǵan barlyq súıek quzyrly organdardyń qatysýymen tirkelip, belgilengen tártippen keıin qaıta jerleý úshin mamandandyrylǵan uıymǵa tapsyrylady, - delingen ákimdik jaýabynda. 

Esterińizge salaıyq, buǵan deıin qurylysy bastalǵan sport nysanynyń ornynda bir ǵasyrdan astam ýaqyt buryn hrıstıandardyń zıraty bolǵanyn jazǵan edik. Qalada qurylys qarqyn alǵandyqtan ony jabýǵa týra kelip, ústinen ǵımarattar turǵyzylǵan. Qazirgi qurylys alańynda da jas natýralısterdiń stantsııasy ornalasty.