Petropavlda sý tarıfi ózgerýi múmkin: kásipkerler shyǵynnyń kóbeıýine qarsy

PETROPAVL. KAZINFORM — Petropavlda keler jyldan bastap asý tarıfi — 38%, al káriz qyzmeti 12% qymbattaýy múmkin.

sý
Foto: Kazinform / Pexels / Freepik

Oblys ortalyǵyn sýmen qamtyp otyrǵan «Qyzyljar sý» JShS-niń bul usynysy óńir kásipkerleriniń basqosýynda talqylandy.

Kásiporynnyń bas ekonomısi Elena Petrova tarıfti kóterý sý qubyrlaryn jańartý, tazartý nysandaryn qaıta jańǵyrtý jáne qyzmetkerlerdiń jalaqysyn arttyrý qajettigimen baılanysty ekenin túsindirdi.

2027–2031 jyldarǵa arnalǵan ınvestıtsııalyq baǵdarlamanyń jalpy quny 16,4 mlrd teńgeden asady. Oǵan alty joba engen, onyń aıasynda uzyndyǵy 23,6 shaqyrym sý qubyryn jáne 6,6 shaqyrym káriz jelisin jańartý josparlanǵan.

— «Qyzyljar sý» JShS-niń 2027–2031 jyldarǵa arnalǵan ınvestıtsııalyq baǵdarlamasyna qajet somanyń 3 mlrd 325 mln teńgesi kásiporynnyń óz qarajaty bolsa, 13 mlrd 151 mln teńgesi nesıe esebinen qarjylandyrylmaq. Josparlanǵan jobalardy júzege asyrý tarıfterdiń ósýine áser etedi. 2027 jyly sýdyń 1 tekshe metrine arnalǵan ortasha tarıf QQS-syz 418,521 teńge, al sý burý qyzmeti 299,91 teńge bolady dep boljanyp otyr. Qoldanystaǵy tarıfpen salystyrǵanda aýyzsý baǵasy — 38%, al káriz qyzmeti 12% ósýi múmkin, — deıdi Elena Petrova.

Usynylǵan tarıfke sáıkes, turǵyndar úshin aýyzsýdyń bir tekshe metri 101 teńgeden 139 teńgege, al zańdy tulǵalar úshin 591 teńgeden 816 teńgege deıin ósýi múmkin. Jeke tulǵalar úshin aýyzsýdyń tarıfin 101 teńgeden 139 teńgege deıin kóterý usynylǵan. Al zańdy tulǵalar, ıaǵnı kásiporyndar men bıznes ókilderi úshin baǵa 591 teńgeden 816 teńgege deıin ósýi múmkin.

Kásipkerler tarıfterdiń arasyndaǵy úlken aıyrmashylyqqa jáne óndiris shyǵyndarynyń kóbeıýine qarsylyq bildirdi.

Óńirlik keńes tóraǵasy Sergeı Domaevtyń aıtýynsha, sý tutynýdyń shamamen 70% jeke sektordyń úlesine tıesili. Jaz mezgilinde baqshalardy sýarý saldarynan keıbir óndiris oryndaryna sý jetpeı qalatyn jaǵdaılar da kezdesedi.

Al «ZMO» JShS atqarýshy dırektory Elena Balıarıhına kommýnaldyq qyzmetterdiń qymbattaýy kásiporyndardyń shyǵynyn arttyratynyn aıtty. Onyń sózinshe, bıyl zaýyt jylý úshin jarty aıda 2,6 mln teńge tólegen. Eger kelesi jyly sý tarıfi de kóterilse, bul óndiris shyǵyndaryna qosymsha salmaq túsiredi.

Qazirgi ýaqytta «Qyzyljar sý» JShS-niń tarıfti ózgertý týraly ótinimi Tabıǵı monopolııalardy retteý komıtetiniń Soltústik Qazaqstan oblysy boıynsha departamentinde qaralyp jatyr. 8 qazanda jarııa tyńdaýlar ótkizilgen.

Kásiporyn ókilderiniń málimetinshe, tarıfti bekitý týraly túpkilikti buıryq qarasha aıynyń sońyna deıin shyǵýy múmkin. Ázirge jańa tarıftiń naqty mólsheri belgisiz.

Buǵan deıin Astana áýejaıy 20 jylǵa jýyq ózgermegen tarıfti qaıta qaraýdy usynǵanyn jazǵan edik.