Petropavlda sýǵa ketken baspanalardy tekserý nátıjesinde 238 úı apatty dep tanyldy

PETROPAVL. KAZINFORM – Petropavlda sý astynda qalǵan 2156 úıdiń jartysynan astamy tehnıkalyq tekseristen ótti. Ázirge 537-siniń ǵana qorytyndysy daıyn, 238 baspana apatty dep tanyldy.

Óńirlik kommýnıkatsııalar qyzmetinde Petropavl ákiminiń baspasóz hatshysy Ásem Aıtýlova sý tasqynynyń zardabyn joıýǵa qatysty atqarylǵan jumysqa esep berdi.

Ákimdik ókiliniń aıtýynsha, Petropavlda 6 uıym tehnıkalyq tekserý júrgizse, 7 uıymǵa baǵalaý júktelgen. Budan bólek búlingen múlikti baǵalaýdy 7 uıym júrgizedi.

Sonymen qatar, smetalyq esep júrgizý úshin 6 kompanııa tartylǵan.

«Qalpyna keltirýge jatpaıtyn úılerdiń tizimi apta saıyn qalalyq ákimdiktiń resmı saıtynda «ártúrli» bóliminde derekterdiń túsýine qaraı jańartylyp otyrady. Baǵalaýshylar menshik ıesimen aldyn ala baılanysady, tekserý júrgiziletin kún men ýaqyt belgilenedi. Menshik ıesiniń ózimen birge jeke kýáligi, úıdiń tehnıkalyq pasporty, quqyq belgileıtin qujattary jáne jerge aktisi bolýy qajet. Menshik ıesiniń ókili bolǵan jaǵdaıda senimhatty kórsetedi», - deıdi Ásem Aıtýlova.

Mamannyń aıtýynsha, múlikke qujat bolmaǵan jaǵdaıda menshik ıesi olardy resimdeýi kerek.

«Qalalyq ákimdiktegi 425 kabınette osy máseleler boıynsha keńes beriledi. Sondaı-aq, 134 kabınette saǵat 14:30-dan 18:00-ge deıin advokat tegin keńes beredi. Notarıattyq palata halyqqa keńes berý úshin kezekshi notarıýsty bekitken. Barlyq sot rásimderi jedeldetilgen tártippen júzege asyrylady», - deıdi ákimdik ókili.

Qazirgi ýaqytta úılerdi jóndeý jáne aýmaqtardy tazartýǵa kómektesý úshin Petropavlda mehanıkalandyrylǵan brıgadalary bar jedel shtabtar jumys istep jatyr.

Buǵan deıin SQO-nyń sý basqan Qyzyljar aýdany turǵyndaryna 540 mln teńge birjolǵy tólem jasalǵanyn aıttyq.