Petropavlda sý basý qaýpi joǵary Zarechnyı kenti turǵyndaryna jańa páterler berildi
PETROPAVL. KAZINFORM — Petropavlda jylda kóktemde sý basý qaýpi bar Zarechnyı kenti turǵyndarynyń alǵashqy legine jańa eki-úsh bólmelik páterlerdiń kiltteri saltanatty túrde tabys etildi.
«Jas Órken» shaǵyn aýdanynda qoldanysqa berilgen kópqabatty úı osy maqsatta arnaıy salynǵan. Bul joly 40 turǵyn baspanaly bolsa, taǵy 50 otbasy jańa jyldy jańa páterde qarsy almaq.
— Táýelsizdik kúninde oblys ortalyǵynda «Jas Órken» shaǵyn aýdanynda 90 páterli turǵyn úı paıdalanýǵa berildi. Bul sý tasqyny qaýpi bar aımaqta kóp jyl boıy turyp kelgen halyq úshin mańyzdy oqıǵa. Negizgi maqsat — turǵyndarǵa jaıly jaǵdaı jasap, qaýipsiz aýmaqqa kóshirý. Bul jumys keler jyly da jalǵasatyn bolady, — dedi Soltústik Qazaqstan oblysynyń ákimi Ǵaýez Nurmuhambetov.
Zarechnyı kenti turǵyndarynyń taǵy bir bóligi jańa baspanaǵa jazda kirmek. Qazir 72 páterli kópqabatty úıdiń qurylysy júrip jatyr.
Petropavl qalasynyń ákimi Serik Muhamedıevtiń aıtýynsha, josparda 117 páterli turǵyn úı qurylysy da bar. Ol da «Jas Órken» shaǵyn aýdanynda salynyp, kúzge deıin qoldanysqa berilmek.
Buǵan deıin Aqmola oblysynda sýda qutqarý stantsııasy ashylǵanyn jazǵan edik.