Petropavlda sý jelisinde bolǵan apat joıylyp, úılerge sý berildi

PETROPAVL. QazAqparat – Petropavlda úılerdi sýmen jabdyqtaý tolyq qalpyna keltirildi. Bul týraly atalǵan shahardyń ákimi Rýslan Ańbaev óziniń áleýmettik jelidegi resmı paraqshasynda jazdy, dep habarlaıdy QazAqparat tilshisi.

Qala basshysynyń málimetinshe, sý jelisinde bolǵan iri apat saldarynan bir táýlik sýsyz otyrǵan 9 úıge keshe sý berilgen.

«Qurmetti qala turǵyndary! Apattyq ýchaskedegi jóndeý jumystary aıaqtaldy. 9 úı tolyǵymen aýyz sýmen qamtyldy», - dep jazdy Petropavl ákimi óziniń Іnstagram paraqshasynda.

Eske salaıyq, 1 jeltoqsanda saǵat 18:00 shamasynda Petropavl qalasynda sý jelisinde apat bolyp, qala turǵyndary sýsyz qalǵan edi.

Keıin oqıǵa ornyna jumysyna endi kirisken SQO ákimi Aıdarbek Saparov baryp, jaǵdaımen tanysty.

Petropavl ákimdiginiń málimetinshe, sý jelisinde bolǵan apatqa merdiger kompanııa jaýap beredi. Óıtkeni, byltyr paıdalanýǵa berilgen sý trassasynyń kepildi merzimi aıaqtalmaǵan.