Petropavlda sý tasqynynyń saldaryn joıý boıynsha jumystar jalǵasýda (FOTO)
PETROPAVL. QazAqparat - Soltústik Qazaqstan oblysynda 112 qyzmetine turǵyn úıler men aýladan sý aıdaýǵa kómek suraǵan qońyraýlar kelip túsýde. Bul týraly óńirlik TJD-nyń baspasóz qyzmeti habarlady.
«Oblys ákiminiń ókimimen 31 naýryzdan bastap táýlik boıy jumys isteıtin sý tasqynyna qarsy shtab quryldy. Jumys kenti, Benzostroı, Podgornyı, Kopaı jáne qalanyń basqa da shaǵyn aýdandarynyń turǵyndary qarǵyn sýmen arpalysýda. 30 naýryzda oblystyń Apat medıtsına ortalyǵy fılıalynyń jedel den qoıýymen Máskeý kóshesi boıynsha sý basý aımaǵynan densaýlyq jaǵdaıyna baılanysty shyǵa almaǵan 85 jastaǵy Petropavl turǵyny qaýipsiz jerge shyǵaryldy», - delingen habarlamada.
Dáriger-qutqarýshylar zardap shekken áıeldi zembilmen alyp shyǵyp, týystarynyń úıine jetkizdi.
Tórt kún ishinde, 28-31 naýryz aralyǵynda jedel shtabqa júzden astam qońyraý shalynǵan. 1000 tekshe metr sý aıdaldy. Sý tasqynynyń saldaryn joıý boıynsha jumystar jalǵasýda jáne ol TJD-nyń turaqty baqylaýynda.
