Petropavlda sý tasqynyna baılanysty tótenshe jaǵdaı jarııalandy
PETROPAVL. QazAqparat - Petropavlda tótenshe jaǵdaı jarııalandy, dep habarlaıdy «QazAqparat» HAA tilshisi.
Esil ózeniniń arnasynan asýyna baılanysty oblys ortalyǵyndaǵy Zarechnyı jáne Kojzavod kentinde 200 úıdi túnde sý basty. Kojzavod kenti turǵyndarynyń aıtýynsha, jıhazdar men tehnıkany áreń shyǵaryp úlgergen. Tabıǵı apat tek kósheler men aýlalardy emes, sondaı-aq 95 úıdi de zaqymdady. 
SQO ákimi Qumar Aqsaqalov sý tasqyny ahýaly jónindegi kún saıynǵy brıfıngin bul joly zardap shekken móltek aýdandarda ótkizdi. Bul jerlerdegi sýdyń mólsheri azaıar emes. Eki saǵatta onyń deńgeıi 6 santımetrge kóterildi. 
«Jaǵdaı óte qıyn. Esil ózeniniń alqaby úsh táýlikte 1,7 metrge artqan. Bıyl qar kóp jaýdy, Sergeevskıı sý qoımasy tolyp qaldy. Bul sýlar ózendi tómen boılaı aǵyp jatyr. Qazir Kojzavod kentinde 95 úıdi sý bassa, Zarechnyı kentinde 105 úıdi sý shaıyp ketti. Sýdyń mólsheri kóbeıýde. Sýdyń deńgeıi 50 sm-ge kóteriledi dep kútilýde. Basty maqsat - kenttegi barlyq adamdardy evakýatsııalaý», - dedi Qumar Aqsaqalov.
1,7 shaqyrymdyq eski dambany qaıta turǵyzý jumystary júrgizilýde. Ótken jyly kentte jańa qorǵanys qamaly salynǵan bolatyn. Eger sýdyń deńgeıi 10 santımetrden assa, damba ony ustap qala almaıdy.
