Petropavlda sý tasqynynan zardap shekkenderge shyǵyndy óteý tártibi túsindirilip jatyr

PETROPAVL. KAZINFORM – Petropavlda tasqynnan zardap shekkenderge notarıaldyq keńseler men advokattar tegin qyzmet kórsetpek.

Soltústik Qazaqstan oblysy Tótenshe jaǵdaılar departamentiniń daǵdarys ortalyǵynda ótken brıfıngte Petropavl ákimi Serik Muhamedıev sý tasqynynan zardap shekkenderdiń basty máselesi – shyǵyndy óteý tártibine toqtaldy.

«Birinshisi – 100 AEK kóleminde áleýmettik kómek taǵaıyndaý týraly ótinish. Ekinshisi - tabıǵı apat keltirgen shyǵynnyń ornyn toltyrý týraly ótinish. Biz bul jumysty advokattarmen, notarıaldyq keńselermen, prokýratýramen birlese otyryp atqaryp jatyrmyz. Notarıaldyq keńse jábirlenýshilerge bas senimhat berý jáne t.b. máselelerde tegin qyzmet kórsetedi. Advokattarǵa keletin bolsaq, olar sotta kez kelgen joǵalǵan qujattar jáne muragerlik quqyǵyna qatysty máselelerdi tezirek qaraýy úshin jábirlenýshilerdiń múddelerin qorǵaıtyn bolady», - dedi Petropavl qalasynyń ákimi Serik Muhamedıev.

Tólemder berile bastaýy úshin Tótenshe jaǵdaılar departamenti sý basqan aımaqtaǵy úılerdiń tizimin usynýy qajet.

Al sý tasqynynan zardap shekkenderge ótemaqy tóleýdiń zańdylyǵyn prokýratýra qadaǵalaıdy.

«Prokýratýra áleýmettik jeliler men messendjerlerde quqyqtyq túsindirý jumystaryn júrgizip jatyr. Sondaı-aq úılerdi sý basqan aýdandarda, evakýatsııa pýnktterinde de turǵyndarmen jınalystar ótkizildi. Áleýmettik tólemder men múliktiń ótemaqysyn qalaı alý kerektigi túsindirildi», - dedi brıfıngke qatysqan Petropavl qalasynyń prokýrory Tynybek Saparov.

Al áleýmettik kómekti alý úshin tabıǵı apattan zardap shekken Petropavl turǵyndary qalalyq ákimdikke jáne jumyspen qamtý jáne áleýmettik baǵdarlamalar bólimine habarlasa alady.

Buǵan deıin Memleket basshysynyń SQO-ǵa jumys saparymen baryp, sý basqan óńirdiń jaǵdaıyn kórgenin aıtqan edik.