Petropavlda tasqyn kezinde isten shyqqan sý beretin nysan jóndeldi
PETROPAVL. KAZINFORM – Petropavl sý arnasynyń jelidegi qysymy standartty mánderge jetkizilip jatyr. Esil ózenindegi 1-kótergish sorǵy stantsııasy qaıta iske qosyldy.
Petropavl qalalyq ákimdiginiń málimetinshe, «Qyzyljar sý» JShS negizgi sý alý kózi – Esil ózenindegi 1-kótergish sorǵy stantsııasynda jumys aıaqtaldy.
Sý qubyryn qosý nátıjesinde qalaǵa beriletin sý kólemi ulǵaıdy jáne jelidegi qysym qalypty mejege jetkizildi.
«Qalamyz úshin qıyn-qystaý kezeńde shydamdylyq tanytqan Petropavl turǵyndaryna, sondaı-aq tótenshe jaǵdaıdyń alǵashqy kúnderinen jumysyn tastamaǵan «Qyzyljar sý» JShS-niń barlyq qyzmetkerlerine sheksiz alǵysymyzdy bildiremiz. Sorǵy stantsııasyn qalpyna keltirýge táýlik boıy tize búkpeı atsalysqan energetıkterdiń jóndeý brıgadalaryn, onyń ishinde olardyń bastyǵy Evgenıı Mokrenskıı men kárizdik tazartý stantsııasynyń bastyǵy Andreı Novıkovty erekshe atap ótkimiz keledi» delingen ákimdik taratqan habarlamada.
Esterińizge salaıyq, 12 sáýir kúni sý tasqynyna oraı Petropavl qalasynda sý berý toqtap qaldy.
Tasqynmen kelgen muz birinshi kótergish stantsııasyna qýat beretin elektr jelisiniń baǵandaryn qulatqan edi.
Máseleni sheshý úshin balama sý kózderin izdeýge týra keldi.
Petropavlda jergilikti bılik balama sý kózin qosyp, turǵyndardy sýmen qamtý máselesin eki kún ishinde sheshti.