Petropavlda sý deńgeıi kóterildi: Jaǵdaı tolyq baqylaýda
PETROPAVL. QazAqparat - SQO-daǵy Sergeev sý qoımasynda sý deńgeıi ekinshi ret kóterilip jatyr, dep habarlaıdy QazAqparat tilshisi.
«Qazgıdromet» RMM SQOF málimetinshe, mol sý - Aqmola oblysynan kelip jatyr. Sergeev sý qoımasyndaǵy sý deńgeıi 921 sm jetti, syıymdylyǵy 693 mln tekshe metr bolsa, qazir kólemi 842 mln tekshe metrdi qurap otyr. Jıeginen 121 sm asyp ketti. Sol sebepti qazir sekýndyna 714 tekshe metr sý jiberilip jatyr.
Mamandardyń aıtýynsha, Petropavldaǵy jaǵdaı turaqty. Bir táýlikte mundaǵy sý qoımasyndaǵy deńgeı 4 sm-ge kóterilip, 866 sm-ge jetti. Buǵan deıin habarlaǵanymyzdaı, Esil ózeni Zarechnyı kenti mańynda arnasynan shyǵyp, Chelıabi-Novosibir baǵytyndaǵy respýblıkalyq mańyzy bar joldy shaıyp ketken bolatyn.
SQO Tótenshe jaǵdaı departamenti mamandarynyń málimetinshe, jaǵdaı tolyq baqylaýda. Kúre jol jabylǵanymen, aınalma jol jumys istep jatyr, ıaǵnı baılanys úzilgen joq. Al Zarechnyı kentiniń janynda arnaıy beket ashylyp, qutqarýshylar ótimdiligi joǵary avtokólikpen kezekshilik atqarýda.
