Petropavlda sý basýy múmkin saıajaı aýmaqtarynda kezekshilik uıymdastyryldy
PETROPAVL. KAZINFORM – Petropavlda Esil ózeniniń deńgeıi kóterilip keledi, birer kúnde arnasynan shyǵyp, tasý qaýpi bar.
«Qazgıdromet» kásiporny Soltústik Qazaqstan oblystyq fılıaly eskertý jarııalady. Gıdrologtardyń aıtýynsha, ótken táýlikte Petropavl mańynda Esil ózeniniń sý deńgeıi 26 sm-ge kóterilip, 902 sm-ge jetti. Qaýipti deńgeıge 40 sm qaldy. Osy shekke jetken jaǵdaıda Esil ózeni arnasynan shyǵyp tasıdy, saldarynan saıajaı ýchaskelerin jáne avtojoldy basý qaýpi bar.
Osyǵan oraı SQO Tótenshe jaǵdaılar qyzmeti men oblystyq polıtsııa departamenti Esil ózeni jaıylmasyndaǵy saıajaılarda baqylaýdy kúsheıtti.
SQO TJD málimetinshe, saıajaı ıelerimen aldyn ala túsindirý jumystary júrgizilip, ýchaskeden ýaqytsha ketý qajettigi eskertildi. Mundaı sharalar tótenshe jaǵdaılardyń aldyn alý maqsatynda jyl saıyn júzege asyrylady.
Sondaı-aq qutqarýshylar men polıtsııa qyzmetkerleri kúsheıtilgen rejımge kóship, táýlik boıy kezekshilik atqaratyn beketter qoıyldy. Aýmaq patrýldenip, drondardyń kómegimen jaǵdaı baqylaýǵa alyndy.
Buǵan deıin QR TJM Aqmola, Soltústik Qazaqstan jáne Shyǵys Qazaqstan oblystarynda qaýip saqtalǵanyn málim etkenin jazǵan edik.
