Petropavlda sý basý qaýpi bar «Qyzyljar sý» kásiporny bógetterdi nyǵaıtyp jatyr

PETROPAVL. KAZINFORM – Petropavldaǵy mańyzdy nysandardyń biri – «Qyzyljar sý» JShS-gi sý tasqynyna daıyndyqty búgin-erteń aıaqtamaq. Kásiporyn tasqyn sýdan qorǵaný úshin bógetterdi taǵy bir metrge joǵarylatty. 

«Qyzyljar sý» JShS-niń atqarýshy dırektory Arman Saýytovtyń aıtýynsha, keshe bógetti taǵy bir metrge kóterý qajettigi týraly tapsyrma túsken. Qazirgi ýaqytta qyzý jumys júrip jatyr. Qajetti qum-balshyqty ákimdik jetkizip berse, qalǵanyn óz jumysshylary atqaryp jatyr.

«2015 jyly sý tasqyny bolatynyn bilgende biz ózimiz eshkimdi kútpeı bóget qurylysyn bastadyq. Osylaısha 3-4 kúnniń ishinde salyp shyqtyq, sonyń nátıjesinde sý bizdiń aýmaqqa kirgen joq.

Al 2017 jyly aýqymdy sý tasqyny bolǵanda jaıylǵan sý «Qyzyljar sý» JShS aýmaǵyna da kirdi. Bıyl da sý basý qaýpi joǵary, sol sebepti kásiporyn aýmaǵynda da bıiktigi 1-1,5 metrlik bóget salyp jatyrmyz. Uzyndyǵy – 400 metr bolady», - deıdi Arman Saýytov.

Mamannyń aıtýynsha, turǵyndarǵa alańdaýǵa negiz joq.

Kásiporyn aýmaǵynda eki stantsııa ornalasqan. Birinshi stantsııa Esil ózeninen sýdy soryp, qalalyq sý jelisindegi sý tazartý qurylystaryna jiberedi. Ol jerde súzgilerden ótip, tazartylyp, ekinshi stantsııa arqyly qalaǵa taza sý beriledi. Búgin-erteń kásiporyn aýmaǵynda sý tasqynyna qarsy jumystardy aıaqtaımyz», - deıdi Arman Saýytov.

Buǵan deıin SQO-da ótken táýlikte 5 eldi mekennen 178 adamnyń qaýipsiz jerge shyǵarylǵanyn aıtqan edik.