Petropavlda sý arnasynan asyp, kólik qozǵalysyna kedergi keltirdi
PETROPAVL. QazAqparat - Sý tasqynynyń saldarynan Petropavl mańyndaǵy jolda barlyq kólik quraldarynyń qozǵalysyna shekteý qoıyldy, dep habarlaıdy QazAqparat.
«Chelıabınsk-Novosibir» respýblıkalyq baǵytyndaǵy avtojol boıynda jeńil kólikterdiń qozǵalysyna shekteý sáýir aıynyń 25-nen bastap qoıylǵan.
SQO TJD baspasóz qyzmetiniń málimdeýinshe, búginde munda barlyq kólik túrleriniń qozǵalysyna tyıym salynǵan. Polıtsııa qyzmetkerleri men jol qurylys uıymdary eskertý belgilerin qoıyp, jol shebinde táýlik boıy kezekshilik uıymdastyrǵan.
KT-4 «A-16- Novonıkolskıı -Andreevka» oblystyq baǵytyndaǵy avtojol mańyndaǵy Esil ózeni arqyly ótetin kópir barlyq kólik túrleri úshin jabyldy.
«Aınalmaly joldary jumys istep turǵandyqtan, kólik qatynasynda aıtarlyqtaı qıyndyqtar baıqalmaıdy. Sý deńgeıiniń kóterilýine baılanysty eldi mekenderdegi úılerdi sý alý faktisi tirkelmegen»,-dep habarlaıdy baspasóz qyzmeti.
Esil ózeni boıynda sýdyń azdap qaıtýy baıqalady. Búginde Sergeevskıı sý qoımasyndaǵy tasqyn sýdyń deńgeıi 56 santımer. Bastapqy mólsherine qaraǵanda, sý deńgeıiniń turaqty tómendeýi baıqalýda. 19 sáýirdegi jaǵdaı boıynsha, sý deńgeıi 168 santımetr bolǵan. Petropavl gıdrotoraby bógenindegi tasqyn sýdyń kedergisiz aǵýy úshin arnaıy qurylǵylar qoıylǵan.
