Petropavlda sirke qyshqyly men dáriden ýlanǵan 4 adam qaıtys boldy

PETROPAVL. KAZINFORM – Petropavlda sirke qyshqyly men dári-dármekti kóp mólsherde paıdalanýdan ýlanǵandar sany artqan.  

Petropavl qalalyq kópbeıindi jedel medıtsınalyq járdem aýrýhanasy baspasóz qyzmetiniń málimetinshe, jyl basynan beri osyndaı 11 oqıǵa tirkeldi, tórt jaǵdaıda adam ólimimen aıaqtaldy. Al byltyr ýlanǵan 79 adam aýrýhanaǵa túsken.

Dárigerlerdiń aıtýynsha, ýlanýdyń negizgi sebepteri — ózine-ózi qol salý áreketi jáne abaısyzda iship qoıý.

— Dári-dármekti dozadan artyq qabyldaý tynys alýdy qıyndatady, júrek qaǵysyn buzyp, adam komaǵa túsýi nemese ólim ketýi múmkin. Uıyqtatatyn dárilerdiń, antıdepressanttardyń, aýyrsynýdy basatyn dárilerdiń jáne júrek preparattarynyń kóp dozasy ásirese qaýipti. Eger ýlanǵandyǵyńyz jaıly shamaly kúdik bolsa da jedel járdem shaqyrý kerek, - deıdi aýrýhana dárigerleri.

Sirke qyshqylyn ishý saldarynan ishki aǵzalar men tynys alý joldary kúıip qalady. Zardap shekken adam azap shegedi, qatty aýyrsynyp, dem ala jáne juta almaıdy. Baýyr, búırek jáne basqa músheler aýyr zaqymdanady. Al 5-7 kúnnen keıin arty ólimge ákeledi nemese naýqas asqynýdyń saldarymen kúresip, uzaq ýaqyt em qabyldaýy qajet.

— Dári-dármekter men sirke qyshqylyn qol jetpeıtin jerde, ónimderden bólek jerde saqtańyz, anyq tańbasy bolsyn. Taǵaıyndalǵan preparattardyń dozasyn asyrmańyz.

Tyǵyryqtan shyǵar jol árqashan bar ekeni esińizde bolsyn. Eger qınalsańyz, másele sheshilmeıtindeı kórinse — jaqyn adamdaryńyzdan, dostaryńyzdan nemese mamandardan kómek surańyz. Siz jalǵyz emessiz, - deıdi mamandar.

Buǵan deıin Petropavlda balalardyń quqyǵyn buzatyn Telegram arna jumys istep turǵanyn jazǵan edik.