Petropavlda sport ardagerleri arasynda bılıardtan ótken respýblıkalyq týrnır máresine jetti
PETROPAVL. QazAqparat – Petropavlda úsh kún boıy sport ardagerleri – júzden astam adam bılıard sportynan jarysty. Oblys ortalyǵynda jasy elýden asqandar arasynda Naýryz meıramyna oraı respýblıkalyq týrnır ótti, dep habarlaıdy QazAqparat tilshisi.
«Vyzov Severa» atty respýblıkalyq týrnırdi uıymdastyrýshylardyń aıtýynsha, bul jarys sońǵy jeti jylda 24-shi ret uıymdastyrylyp otyr. Al Petropavlda Naýryz merekesine jáne «Álem qyrandary» bılıardshylar qaýymdastyǵy» RQB-nyń qurylǵanyna 7 jyl tolýyna oraı alǵash ret ótti.
«Týrnır 19 naýryz kúni saltanatty ashyldy. Sol kúni jeti adamǵa «Qurmetti bılıardshy» tósbelgisin tabystadyq. Týrnırge elimizdiń túkpir-túkpirinen 14 komanda, 100-den astam sportshy qatysty. Maqsat – salamatty ómir saltyn nasıhattaý, sportqa oń kózqarasty qalyptastyrý, bılıard sportynyń damýyna at salysý», - deıdi START BK jetekshisi Nıkolaı Hvan.
Týrnır eki jas sanaty: 50-63 jáne 63-ten asqandar boıynsha ótti. Komandalyq jáne jeke esep boıynsha synaldy. Nátıjesinde komandalyq esepte +50 arasynda Shymkent sportshylary jeńiske jetti. Ekinshi oryndy Taldyqorǵannyń «Jetisýy», úshinshi oryndy Almatynyń «NAP» komandasy aldy. Al jekeleı esepte taldyqorǵandyq Ermek Tynysbaev úzdik dep tanyldy.
63+ sanatynda astanalyq «Tarlan» jeńis tuǵyrynan kórindi. Ekinshi-úshinshi oryndardy Shymkenttiń jáne Nur-Sultannyń «Álem qyrandary» bólisti. Al jekeleı esepte astanalyq Vıktor Lı úzdik nátıje kórsetti.
