Petropavlda sottalǵandar týberkýlezge tekserilip jatyr
PETROPAVL. QazAqparat – Petropavlda týberkýlez aýrýynyń aldyn alýǵa baǵyttalǵan aılyq aıasynda probatsııa qyzmetiniń esebinde turǵandar tekserilip jatyr, dep habarlaıdy QazAqparat tilshisi.
24 naýryz – týberkýlezge qarsy dúnıejúzilik kúres kúni. Osyǵan oraı Soltústik Qazaqstan oblysynda ókpe aýrýyn erte bastan anyqtaýǵa baǵyttalǵan aılyq júrip jatyr. Týberkýlez juqpaly, qaýipti aýrý. Alaıda ony emdeýge jáne asqyndyrmaı aldyn alýǵa bolady.
SQO boıynsha qylmystyq atqarý júıesi departamenti baspasóz qyzmetiniń málimetinshe, Petropavl qalasy probatsııa qyzmeti bólimi men «Senim-Soltústik» qoǵamdyq birlestigimen kelisim bar. Qoǵamdyq uıym jylda probatsııa qyzmetinde esepte turǵandardy týberkýlezge tekseredi. Bul joly da jyljymaly flıýorografııa probatsııa qyzmeti janynda jumys istedi.
«Bul, qazirgideı karantın jaǵdaıynda, óte yńǵaıly. Emhanaǵa baryp kezek kútpeıdi. Sottalǵandar ǵana emes, probatsııa qyzmetiniń qyzmetkerleri de, turǵyndar da tekserilýge múmkindik aldy. Aktsııanyń mańyzy zor. Qaýipti aýrýdy erte satysynda anyqtaýǵa kómektesedi», - deıdi SQO boıynsha QAJD bastyǵy Rýstan Ahmetjanov.
Bir kúnniń ishinde flıýorografııalyq skrınıgten 50-den astam sottalǵan ótti. Jalpy byltyr jańadan 219 adamda týberkýlez anyqtalsa, sonyń 15-i osyndaı aktsııa aıasynda aýyratynyn bilgen.
